Pinadali ng Department of Energy (DOE) ang pag-install ng maliliit na solar panels para sa mga bahay at negosyo bilang bahagi ng hakbang na palawakin ang paggamit ng renewable energy at makatulong sa pagpapababa ng gastos sa kuryente.
Sa ilalim ng Department Circular No. DC2026-08-0017, hindi na maaaring hingan ng distribution utilities ang mga consumer ng pre-installation clearance, technical permit o inspection fee bago magkabit ng zero-export solar system o micro-solar unit.
Para sa plug-and-play Micro-Solar Systems na hanggang 1 kilowatt, hindi na rin kailangan ang local government building permit at Certificate of Compliance mula sa Energy Regulatory Commission (ERC). Kailangan lamang na magbigay ng written notice sa kanilang power utility matapos ang installation.
Hindi rin maaaring bawasan ng mga power distributor ang transformer o service capacity ng consumer dahil lamang sa pagkakabit ng solar system.
Bahagi ito ng target ng pamahalaan na itaas ang bahagi ng renewable energy sa power generation mix sa 35 porsiyento pagsapit ng 2030 at 50 porsiyento pagsapit ng 2040.
