Muling nagpahayag ng pagtutol ang Alyansa Tigil Mina (ATM) sa pagpapalawak ng pagmimina sa bansa, kabilang ang mga planong proyekto sa Sibuyan Island, sa inilabas nitong pahayag ilang oras bago ang ikalimang State of the Nation Address (SONA) ni Pangulong Ferdinand R. Marcos Jr.
Sa pahayag, sinabi ng ATM na ikinadidismaya nito ang umano'y patuloy na pagsusulong ng administrasyon ng mga polisiyang magpapalawak ng pagmimina, partikular sa mga kritikal na mineral tulad ng nickel, copper, at cobalt.
Ayon sa grupo, wala umanong naging sapat na konsultasyon sa mga apektadong komunidad at environmental groups kaugnay ng panukalang Critical Minerals Framework, na anila'y magbibigay-daan sa mas maraming mining projects sa bansa.
Kasama rin sa binigyang-diin ng ATM ang Sibuyan Island sa mga lugar na umano'y nakararanas ng malawakang pagputol ng mga puno.
“From Quirino Avenue to protected areas in Palawan and Sibuyan Island, to the Samar Islands, to Surigao del Sur – permits to fell hundreds of thousands of trees have been indiscriminately granted. Tree-cutting has become so pervasive, it is already a national issue,” ayon sa pahayag ng ATM.
Nagpahayag din ang grupo ng pagkabahala sa patuloy na pagpapalawak ng black sand mining at seabed quarrying, gayundin sa umano'y kakulangan ng malinaw na polisiya sa pamamahala ng industriya ng pagmimina.
Sa pagtatapos ng kanilang pahayag, binigyan ng ATM ng “failing grade” ang administrasyon ni Pangulong Marcos sa usapin ng pagmimina, dahil sa umano'y agresibong pagsusulong nito ng pagmimina nang walang malinaw na plano sa industriyalisasyon at sa kabiguang maiayon ang mga polisiya sa pangangalaga ng kalikasan at pagtugon sa climate change.
Ang pahayag ng ATM ay pinakahuling naging bahagi ng mga panawagan ng iba't ibang sektor, kabilang ang mga religious organizations, environmental groups, indigenous peoples, at ilang lokal na pamahalaan sa Romblon, na nagpahayag ng pagtutol sa planong pagmimina sa Sibuyan Island.
