Nangako si Pangulong Ferdinand R. Marcos Jr. na ipagpapatuloy ng pamahalaan ang pagpapahusay sa Port of Lucena upang makasabay sa patuloy na pagdami ng mga pasahero at kargamento na dumaraan sa daungan, kabilang ang mga rutang patungong Romblon.
Sa isinagawang inspeksyon ng Pangulo sa itinatayong Passenger Terminal Building (PTB) nitong Martes, sinabi niyang patuloy na palalawakin ang mga imprastraktura upang matugunan ang lumalaking pangangailangan ng publiko.
“Pag nagpapatayo tayo ng infrastructure, kung anuman ang itatayo mo, mapupuno ‘yan. Kaya sasabihin mo, good na ‘yan for 10 years. Now, nauna ‘yung taon at napupuno,” ani Pangulong Marcos.
Ayon sa Pangulo, mahalagang mapahusay ang mga pasilidad ng Port of Lucena upang matiyak ang kaligtasan at kaginhawahan ng mga pasahero, lalo na sa panahon ng masamang lagay ng panahon kung kailan kinakailangang manatili muna sa pantalan ang mga biyahero.
Inaasahang matatapos sa susunod na buwan ang bagong ₱153.43-milyong Passenger Terminal Building, na pinondohan mula sa corporate budget ng Philippine Ports Authority (PPA).
Ang bagong terminal ay may 1,268.19 square meters na pre-departure area na kayang tumanggap ng 928 pasahero. Magkakaroon din ito ng terminal fee booth, ticketing counters, breastfeeding room, prayer room, at 100-kilowatt solar panel system.
Sinabi rin ng Pangulo na tinatayang 500,000 pasahero ang dumaraan sa Port of Lucena kada taon.
Ang Port of Lucena, na matatagpuan sa Barangay Talao-Talao, ay nagsisilbing pangunahing daungan na nag-uugnay sa Timog Luzon at Marinduque. Bukod sa mga rutang ito, nagsisilbi rin itong mahalagang pantalan para sa mga barkong bumibiyahe patungong Romblon at Masbate City, kaya inaasahang higit na mapapakinabangan ng mga biyahero at negosyante ang pagpapalawak ng mga pasilidad nito.
