Hinikayat ng National Nutrition Council (NNC)-MIMAROPA ang mga pamilya, barangay, at lokal na pamahalaan na gawing panghabambuhay na adbokasiya ang wastong nutrisyon, at huwag lamang itong pagtuunan ng pansin tuwing pagdiriwang ng Nutrition Month.
Sa 52nd National Nutrition Month Regional Launching na ginanap sa Romblon State University noong July 7, sinabi ni NNC MIMAROPA Regional Nutrition Program Coordinator Ma. Eileen Bringas Blanco na nagsisimula ang mabuting nutrisyon sa loob ng tahanan at nakasalalay rin sa pangangalaga sa kalikasan.
Ayon kay Blanco, mahalagang mapanatiling malusog ang mga sakahan, pangisdaan, watershed, at biodiversity upang matiyak ang sapat at masustansyang suplay ng pagkain.
Hinimok din niya ang mga komunidad na suportahan ang mga backyard garden, KADIWA markets, at mga lokal na magsasaka, gayundin ang pagpapalawak ng nutrition education sa mga barangay, paaralan, at tahanan.
Binigyang-diin din niya ang kahalagahan ng pangangalaga sa kapaligiran, dahil ang malinis na tubig, matabang lupa, at maayos na kalikasan ang pundasyon ng ligtas at masustansyang pagkain.
“Nutrition Month is not only celebrated every July. Let's make every day a Nutrition Day,” ani Blanco.
Nanawagan din siya sa mga opisyal ng barangay na ipagpatuloy ang paglalaan ng pondo para sa mga nutrition program at hinikayat ang mga magulang na aktibong gampanan ang kanilang tungkulin sa pangangalaga sa kalusugan ng kanilang mga anak.
“Huwag nating iasa lamang sa gobyerno ang pag-aalaga sa ating mga anak. Bilang mga magulang, tayo ang may pangunahing responsibilidad na tiyakin ang kanilang wastong nutrisyon at kalusugan,” dagdag niya.
Aminado rin ang NNC na bagama't may mga naitalang pagbuti sa ilang nutrition indicators sa MIMAROPA, nakapagtala rin ang rehiyon ng bahagyang pagtaas sa kaso ng stunting, na nagpapakita ng pangangailangang higit pang palakasin ang mga nutrition intervention.
Ayon kay Blanco, dapat magsilbing hamon ang mga datos upang higit pang pagtibayin ang pagtutulungan ng mga ahensya ng pamahalaan, lokal na pamahalaan, at mga komunidad sa pagpapatupad ng mga programang magpapabuti sa kalagayan ng nutrisyon ng mga bata.
Kinilala rin niya ang Pamahalaang Panlalawigan ng Romblon, Pamahalaang Bayan ng Odiongan, at Romblon State University sa matagumpay na pagho-host ng regional launching at sa patuloy na suporta sa mga programa sa nutrisyon.
Nagpahayag din si Blanco ng kumpiyansa sa kandidatura ng Odiongan para sa Nutrition Honor Award ng NNC, na aniya'y patunay na ang tuloy-tuloy na pagkilos ng lokal na pamahalaan ay may malaking ambag sa pagpapabuti ng kalusugan at nutrisyon ng mga bata.
