Pormal na itinurn-over ng Department of Science and Technology (DOST) ang Safe Water Treatment System (SAFEWATRs) sa Barangay Budiong, Odiongan noong Hunyo 24 upang mapalakas ang access ng komunidad sa ligtas at malinis na inuming tubig.
Ang turnover ceremony ay bahagi ng patuloy na programa ng DOST sa pagsusulong ng mga teknolohiyang gawa ng mga Pilipinong siyentipiko para sa pagpapabuti ng mga pangunahing serbisyo sa mga lokal na komunidad.
Bago ang turnover, nagsagawa ang DOST Romblon, katuwang ang mga eksperto mula sa DOST–Industrial Technology Development Institute (ITDI), ng dalawang araw na pagsasanay para sa mga operator ng Barangay Local Government Unit ng Budiong hinggil sa tamang operasyon at maintenance ng SAFEWATRs.
Layunin ng pagsasanay na matiyak ang maayos, episyente, at tuloy-tuloy na paggamit ng water treatment system upang makapagbigay ng ligtas na inuming tubig sa mga residente ng barangay.
Ang SAFEWATRs ay isang compact at mobile water treatment system na pinapagana ng solar energy at may kakayahang magproseso ng hanggang 2,000 litro ng ligtas na inuming tubig sa loob ng siyam na oras ng operasyon.
Dinisenyo ang teknolohiya upang magamit sa mga komunidad na nakararanas ng kakulangan sa suplay ng malinis na tubig, kabilang ang mga lugar na apektado ng kalamidad, emergency, at mga liblib na pamayanan.
Bukod sa pagdidisimpekta ng tubig, kaya rin nitong mabawasan ang mga kemikal, mabibigat na metal, at iba pang contaminants upang matiyak na ligtas itong inumin.
Ayon sa DOST, sumailalim ang SAFEWATRs sa iba't ibang performance test at napatunayang nakatutugon sa mga itinakdang pamantayan ng Philippine National Standards for Drinking Water.
Sinabi rin ng ahensya na bahagi ang proyekto ng paggamit ng agham, teknolohiya, at inobasyon upang mapabuti ang kalidad ng buhay ng mga mamamayan at mapalakas ang seguridad sa suplay ng malinis na inuming tubig, lalo na sa mga komunidad na madaling maapektuhan ng mga kalamidad.
Inaasahang magsisilbing mahalagang kagamitan ang SAFEWATRs sa Barangay Budiong upang matiyak ang tuloy-tuloy na suplay ng ligtas na inuming tubig, lalo na sa panahon ng mga emergency at sakuna.
