Lumago ng 4.2 porsyento ang ekonomiya ng rehiyon ng MIMAROPA (Mindoro, Marinduque, Romblon at Palawan) noong 2025, bahagyang mas mababa kumpara sa 4.4 porsyento na naitala noong 2024, ayon sa Philippine Statistics Authority (PSA).
Sa datos, umabot sa ₱447.47 bilyon ang gross regional domestic product (GRDP) ng rehiyon sa constant 2018 prices, na pinalakas ng sektor ng serbisyo at pagbangon ng agrikultura.
Pinakamabilis lumago ang sektor ng public administration at defense, kabilang ang social security, na may 10.4 porsyento. Sinundan ito ng agriculture, forestry and fishing na nagtala ng 8.3 porsyento, at human health and social work activities na may 8.2 porsyento.
Kabilang din sa may mataas na paglago ang other services (7.5%), professional at business services (7.4%), at financial at insurance activities (6.7%). Tumaas din ang transportation at storage (6.6%), accommodation at food services (6.5%), at wholesale at retail trade (6.4%).
Nagkaroon din ng pagtaas sa education (6.3%), information and communication (4.1%), real estate (3.0%), at manufacturing (2.1%).
Gayunman, may ilang sektor na nakapagtala ng pagbaba, kabilang ang electricity, steam, water at waste management services, construction, at mining and quarrying na may pinakamalaking pagbaba na 11.4 porsyento.
Ayon sa PSA, nananatiling isa sa mga pangunahing nagtutulak ng ekonomiya ang sektor ng agrikultura sa kabila ng mga hamon, habang patuloy ding nangingibabaw ang sektor ng serbisyo na may ambag na 52.2 porsyento sa kabuuang ekonomiya ng rehiyon. Sinundan ito ng industry na may 30.6 porsyento at agriculture, forestry and fishing na may 17.2 porsyento.
Ipinapakita ng ulat ang patuloy ngunit bahagyang bumagal na paglago ng ekonomiya ng MIMAROPA sa gitna ng pagbabago sa mga sektor at umiiral na mga hamon.
Discussion about this post