Nagsagawa ang Sangguniang Bayan ng Romblon nitong Lunes ng kauna-unahang livestreaming ng kanilang regular session kasunod ng panawagan ng ilang residente para sa mas bukas na deliberasyon ng konseho.
Sa privilege speech, sinabi ni SB Miguel Montojo na sa pamamagitan ng livestreaming, makikita ng publiko ang mga talakayan, deliberasyon, at pagbobotohan ng mga konsehal hinggil sa mga panukalang ordinansa at resolusyon ng munisipyo.
Ayon sa konsehal, layunin ng hakbang na mabigyan ng pagkakataon ang mga mamamayan na masubaybayan ang proseso ng paggawa ng mga polisiya at ang mga usaping tinatalakay sa loob ng sesyon.
Matatandaang noong Enero, nabigo ang unang panukala para sa livestreaming matapos lamang makakuha ng tatlong botong pabor, apat na tutol, at tatlong abstain. Dahil dito, hindi ito naaprubahan sa naturang botohan.
Sa panibagong botohan nitong Marso, muling inihain ang panukala matapos makalikom si Montojo ng mga pirma mula sa publiko sa pamamagitan ng online at pisikal na petisyon sa iba’t ibang barangay na humihiling na ipasa ang livestreaming ordinance.
Binanggit din ni Montojo na sa pamamagitan ng livestreaming, masusubaybayan ng publiko ang mga deliberasyon at desisyon ng konseho sa real time.
Mapapanood ang regular sessions ng Sangguniang Bayan sa opisyal na Facebook page ng Sangguniang Bayan ng Romblon.
