Nagsagawa ng maagang inspeksyon ang pamunuan ng Department of Transportation (DOTr) sa Batangas Port Passenger Terminal nitong Biyernes, Marso 13, bilang paghahanda sa inaasahang pagdagsa ng mga pasahero sa darating na Semana Santa.
Pinangunahan ang inspeksyon ni DOTr Acting Secretary Giovanni Lopez kasama si Philippine Ports Authority (PPA) General Manager Jay Santiago, at mga kinatawan mula sa Maritime Industry Authority (MARINA) at Philippine Coast Guard (PCG).
Ayon kay Lopez, mahalagang masuri ang kalagayan ng pasilidad ng pantalan dahil isa ito sa pinakaabala o busiest na pantalan sa bansa, lalo na sa panahon ng mga bakasyon at holidays.
Sinuri rin ng kalihim ang mga ticketing booth ng mga shipping line upang alamin ang kasalukuyang pamasahe ng mga ito kasunod ng mga ulat na may pagtaas sa singil dulot ng pagtaas ng presyo ng krudo sa pandaigdigang merkado.
Ipinaliwanag ni Lopez na deregulated ang pamasahe ng mga shipping line at hindi ito direktang kinokontrol ng MARINA. Gayunman, may inilabas na memorandum circular ang ahensya na nagtatakda na kung magtataas ng pamasahe ang mga shipping company ay dapat hindi lalampas sa 20 porsyento at dapat itong maging makatuwiran.
Hinimok din ng kalihim ang mga pasahero na i-report sa kinauukulan ang mga shipping line na magpapataw ng pamasahe na lalampas sa itinakdang limitasyon.
Samantala, tiniyak ng PPA na patuloy na libre ang passenger terminal fee para sa mga senior citizen, persons with disabilities (PWD), mga estudyante, at uniformed personnel.
Ayon naman kay PPA GM Jay Santiago, maliit lamang ang magiging epekto sa presyo ng mga bilihin kung ipatutupad ang panukalang pagsuspinde sa government share sa port charges sa gitna ng pagtaas ng presyo ng langis.
Batay sa pag-aaral ng PPA, tinatayang tatlong porsyento lamang ng kabuuang presyo ng mga produkto ang napupunta sa logistics cost para makarating ang mga ito sa mga tindahan. Sa nasabing bahagi, halos 10 porsyento lamang ang government share mula sa port charges.
Ipinaliwanag ni Santiago na ang pinakamalaking bahagi ng gastusin sa logistics chain ay mula sa shipping charges, na umaabot sa mahigit 50 porsyento, kasunod ang trucking expenses na nasa humigit-kumulang 35 porsyento.
Samantala, bilang bahagi ng panawagan ng administrasyon ni Pangulong Ferdinand Marcos Jr. na magtipid sa enerhiya, nagpatupad na rin ang PPA ng four-day work week at iba pang hakbang sa pagtitipid ng kuryente at gasolina.
Kabilang dito ang pagpapatay ng ilaw at electrical equipment kapag hindi ginagamit, pagpatay ng air-conditioning units pagsapit ng alas-5:00 ng hapon, at pagpapanatili ng thermostat setting na hindi bababa sa 24°C.
Ipinatutupad din ng ahensya ang mahigpit na paggamit ng mga sasakyan ng PPA para lamang sa opisyal na lakad, carpooling arrangement, at no-idling policy upang maiwasan ang pag-aaksaya ng gasolina habang naka-park o naghihintay ang mga sasakyan.
Ang Batangas Port ay isa sa pinakamalaking pantalan sa bansa na may kapasidad na humawak ng hanggang 8,000 pasahero, ngunit sa panahon ng peak season ay umaabot sa mahigit 25,000 pasahero ang dumaraan dito mula sa Visayas at Mindanao.
