Namahagi ng dalawampu’t walong (28) tablets ang tanggapan ni Congressman Eleandro Madrona para sa DepEd Division of Romblon sa isang programa na ginanap ngayong umaga sa Odiongan National High School.
Ayon sa tanggapan ng kongresista, tugon ang naturang pamamahagi sa kahilingan ng DepEd sa pamamagitan ni Dr. Cynthia Eleanor Manalo, Assistant Schools Division Superintendent, upang masuportahan ang mga kagamitang makatutulong sa pagpapahusay at pagpapagaan ng mga gawaing administratibo at mga programang may kinalaman sa digital innovations.
Kabilang sa mga tumanggap ng tablets ang Schools Division Superintendent, Assistant Schools Division Superintendent, mga hepe ng Curriculum Implementation Division at School Governance and Operations Division, Education Program Supervisors, Public Schools District Supervisors at Coordinating Principals.
Personal na ipinamahagi ni Madrona ang mga kagamitan sa harap ng mga opisyal at kawani ng DepEd sa pangunguna ni SDS Roger Capa. Naging saksi rin sa aktibidad ang ilang miyembro ng Sangguniang Panlalawigan at mga alkalde mula sa iba’t ibang bayan sa Tablas Island.
Sa kanyang mensahe, binigyang-pugay ng kongresista ang kanyang mga naging guro na aniya’y naging inspirasyon upang tugunan ang pangangailangan ng DepEd, lalo na kung ito ay para sa kapakanan ng mga mag-aaral.
Nagpasalamat din siya sa DepEd sa patuloy na pagsusulong ng kalidad na edukasyon, at binanggit na ang Division of Romblon ay nangunguna sa rehiyon ng MIMAROPA at pangatlo sa buong bansa pagdating sa literacy rate.
Ayon kay Madrona, nananatiling prayoridad ng kanyang tanggapan ang mga programang magpapaunlad sa sektor ng edukasyon sa lalawigan.
