Nanindigan ang Bayay Sibuyanon, Inc. na hindi maaaring ituring na pahintulot sa pagmimina sa Sibuyan Island ang naging desisyon ng Korte Suprema sa kasong Batan v. MGB, DENR, at Altai Philippines Mining Corporation.
Sa inilabas na pahayag ng grupo, sinabi nitong ang pag deny sa Petition for Writ of Kalikasan ay nakabatay sa mga teknikal na rekisito sa ilalim ng Rules of Procedure for Environmental Cases, partikular sa tinatawag na magnitude requirement. Iginiit ng organisasyon na hindi idineklara ng Korte na ligtas ang pagmimina at hindi rin nito pinawalang sala ang kumpanya.
Binigyang diin ng Bayay Sibuyanon na nananatili ang mga naunang hakbang ng pamahalaan kaugnay sa operasyon ng Altai Philippines Mining Corporation. Kabilang dito ang paglalabas ng Department of Environment and Natural Resources ng Notices of Violation, ang Joint Order na nag utos ng pagpapatigil sa konstruksyon at operasyon ng causeway, at ang pansamantalang pagsuspinde ng Ore Transport Permit.
Noong 2023 ay kusang nagsuspinde ng operasyon ang kumpanya. Mayroon din umanong paulit ulit na pagtutol mula sa mga lokal na pamahalaan at residente ng Sibuyan.
Ayon sa grupo, ang mga hakbang na ito ay nagpapakita na may mga isyu sa pagsunod sa mga tuntunin sa pangangalaga ng kalikasan na hindi pa nareresolba.
Ikinababahala rin ng organisasyon ang mahigit isang taong hindi pag aksyon ng Department of Environment and Natural Resources sa petisyon para kanselahin ang Mineral Production Sharing Agreement ng Altai Philippines Mining Corporation.
Sinabi ng Bayay Sibuyanon na ang petisyon ay nakabatay sa mga alegasyon ng paglabag sa mga patakaran sa kalikasan at iba pang rekisito, ngunit hanggang ngayon ay wala pang inilalabas na pinal na desisyon.
Ayon sa kanila, habang nakabinbin ang petisyon ay nananatiling bukas ang posibilidad ng pagbabalik ng operasyon ng mina.
Ipinaalala rin ng grupo na ang pag expire ng ilang permit tulad ng Ore Transport Permit at Mineral Ore Export Permit ay hindi nagbubura ng mga naunang paglabag at hindi nagpapawalang bisa sa pananagutan ng kumpanya.
Dagdag pa nila, ang pagsuspinde ng operasyon ay hindi kapalit ng malinaw na desisyon sa status ng Mineral Production Sharing Agreement.
Tinukoy ng Bayay Sibuyanon na ang Sibuyan Island ay kinikilala bilang isa sa mayaman sa biodiversity sa bansa at may sensitibong ecosystem. Anila, ang pagmimina sa ganitong lugar ay may pangmatagalang epekto sa kagubatan, kabundukan, ilog, karagatan, at sa kabuhayan ng mga komunidad.
Nanawagan ang grupo sa Department of Environment and Natural Resources na agarang resolbahin ang petisyon para sa kanselasyon ng kasunduan, tiyakin ang transparency sa buong proseso, at maglabas ng malinaw at napapanahong desisyon. Hiniling din nila na unahin ang proteksyon ng kalikasan at kapakanan ng komunidad.
