Tinalakay sa Romblon Sea Transportation Management Meeting ang planong pagre-require ng online ticketing o booking system para sa mga shipping companies bilang bahagi ng mga hakbang upang mas maayos na pamahalaan ang dami ng pasahero, lalo na tuwing peak travel seasons, at maiwasan ang ticket scalping.
Sa pagpupulong, ibinahagi ni Maritime Industry Authority (MARINA) Region IV Regional Director Atty. Maximo I. Banares Jr. na kasalukuyang fina-finalize na ng ahensya ang polisiya na mag-aatas sa lahat ng shipping companies na magkaroon ng online booking system. Ayon kay Banares, makatutulong ito upang maplano nang mas maaga ang pagdaragdag ng biyahe at mga barko, gayundin upang mapabuti ang passenger management tuwing mataas ang demand sa biyahe. Nangako rin ang MARINA na i-fast track ang mga request ng shipping companies para sa karagdagang vessels at schedules.
Pinangunahan ni Governor Trina Firmalo-Fabic ang pagpupulong na ginanap noong Enero 23, 2026 sa Batangas City.
Layunin ng meeting na tugunan ang matagal nang mga isyu sa sea transportation sa lalawigan ng Romblon, partikular ang mga problemang lumilitaw tuwing peak travel seasons na nagreresulta sa kanseladong biyahe at stranded passengers.
Dinaluhan ng mga kinatawan mula sa national government agencies, port authorities, shipping companies, at provincial officials, tinalakay rin sa pagpupulong ang vessel scheduling at route management, pagsusuri sa trip cancellations at service reliability, pamamahala sa mga stranded passengers, at pagpapalakas ng koordinasyon at contingency planning upang matiyak ang ligtas, maayos, at tuloy-tuloy na biyahe ng mga pasahero, turista, at kargamento.
Nag-commit naman ang mga shipping companies na palakasin ang kanilang online booking systems, maglaan ng karagdagang barko tuwing peak season, at pag-aralan ang pag-aayos ng ship schedules upang mapabuti ang inter-island connectivity sa loob ng lalawigan.
Samantala, iniulat ng Philippine Ports Authority (PPA) na kasalukuyan nang dine-develop ang Lucena Port upang makapag-accommodate ng mas maraming pasahero.
Tiniyak din ng Philippine Coast Guard (PCG) ang kanilang kahandaan na magbigay ng tulong at mag-deploy ng mga barko kung kinakailangan upang maiwasan ang pagdami ng stranded passengers sa panahon ng mataas na demand sa biyahe.
