Patuloy ang pagdaing ng maraming hog raisers sa bayan ng Odiongan, Romblon dahil sa mababang presyo ng bentahan ng live weight ng baboy at sa umano’y kawalan ng sapat na pagpapatupad ng pamahalaang lokal sa umiiral na ordinansa na nagtatakda ng presyo nito.
Sa mga sumbong na ipinaabot sa Romblon News Network, sinabi ng ilang hog raisers na naibebenta lamang nila ang kanilang mga alagang baboy sa presyong mula ₱150 hanggang ₱170 kada kilo ng live weight, mas mababa sa itinakdang ₱200 kada kilo batay sa ordinansang ipinasa ng Sangguniang Bayan ng Odiongan.
Setyembre 2025 pa pasado ng Sangguniang Bayan ang bagong taripa na nagtatakda ng ₱200 kada kilo bilang farm gate price ng live weight ng baboy. Gayunman, hanggang sa kasalukuyan ay marami pa ring nagrereklamong magbababoy dahil hindi umano nasusunod ang itinakdang presyo sa aktuwal na bentahan.
Ayon sa mga hog raisers, napipilitan silang tanggapin ang mababang alok ng mga ahente dahil kung hindi maibenta agad ang mga baboy ay lalo silang malulugi. Anila, wala umanong bumibili sa presyong itinakda ng ordinansa kaya’t wala silang ibang pagpipilian kundi ibenta ito sa mas mababang halaga.
“Ang aking baboy naibenta ko ng ₱165 kada kilo noong Martes lang kasi kailangan ko ng pera pampakain pa sa iba. Hindi ko naman alam na ₱200, sa Facebook ko lang nalaman,” ayon sa isang hog raiser mula Barangay Amatong. Dagdag pa nito, nagsimula umano ang tawaran sa ₱180 kada kilo hanggang sa bumaba ito sa ₱165 kada kilo.
Nauna nang hiniling ng lokal na pamahalaan na isumbong sa Municipal Agriculture Office ang mga namimili ng baboy sa mas mababang presyo upang maaksyunan ang paglabag sa ordinansa. Gayunman, iginiit ng mga hog raisers na hindi nila kayang magsampa ng reklamo dahil sa takot na sila ay makilala ng mga ahente at tuluyang hindi na bibilhan ng baboy sa mga susunod na bentahan.
Dagdag pa ng mga hog raisers, patuloy na tumataas ang gastos sa pagpapakain at pagpapalaki ng baboy kaya’t mas ramdam ang lugi sa kasalukuyang sitwasyon.
Inirereklamo rin nila na sa kabila ng murang bili ng mga baboy sa kanila, nananatiling mataas ang presyo ng karne ng baboy sa mga pamilihan, dahilan upang hindi umano maramdaman ng mga mamimili ang pagbaba ng farm gate price.
Nanawagan ang mga hog raisers sa lokal na pamahalaan na paigtingin ang pagbabantay at pagpapatupad ng ordinansa upang maprotektahan ang kanilang kabuhayan at matiyak ang patas na presyo mula produksyon hanggang pamilihan.
Samantala, sa isang Facebook comment, sinabi ni Sangguniang Bayan Member Manuel Fernandez Jr., chairman ng Committee on Agriculture, na may binabalangkas na Implementing Rules and Regulations ang Bantay Presyo Task Force na pinamumunuan ni Mayor Roger Fodra Jr. upang mas mabantayan at maipatupad ang tamang bilihan ng live weight ng mga baboy sa bayan.
