Nagsasagawa ng Tile Setting Training – Batch 2 ang Bureau of Jail Management and Penology (BJMP) Odiongan District Jail bilang bahagi ng kanilang mga programang pangkabuhayan at rehabilitasyon para sa mga Persons Deprived of Liberty (PDL).
Sinimulan ang pagsasanay noong Disyembre 19, 2025, at inaasahang magsisimula naman sa lalong madaling panahon ang ikatlong batch ng programa.
Ayon kay Jail Senior Inspector Dante Montilla, warden ng Odiongan District Jail, layunin ng training na bigyan ang mga PDL ng praktikal at may kasanayang kaalaman na maaari nilang magamit sa paghahanapbuhay sa oras ng kanilang paglaya at pagbabalik sa komunidad.
Aabot sa 25 PDL ang lumalahok sa 10-araw na pagsasanay na isinasagawa katuwang ang TESDA–Citadel Training Center. Matapos ang programa, tatanggap ang mga kalahok ng TESDA certification bilang patunay ng kanilang bagong kasanayan.
Ayon naman kay BJMP MIMAROPA spokesperson Jail Officer 3 Joefrie Anglo, malaking tulong ang naturang pagsasanay upang mabigyan ng bagong pag-asa ang mga PDL.
Ang Tile Setting Training – Batch 2 ay bahagi ng mas malawak na livelihood at skills development program ng Odiongan District Jail na kinabibilangan din ng mga pagsasanay sa carpentry, sewing, at iba pang hanapbuhay.
Bukod sa teoretikal na kaalaman, sumasailalim din ang mga kalahok sa hands-on training upang mas maging handa sila sa mga oportunidad sa trabaho paglabas nila ng kulungan. (PR)
