Humingi ng paumanhin ang Pamahalaang Panlalawigan ng Romblon sa pamilyang nakaranas ng hindi kanais-nais na pagtrato sa Romblon Provincial Hospital (RPH), kasunod ng kumalat na reklamo sa social media kaugnay ng sinasabing hindi maayos na pag-asikaso sa isang batang pasyente.
Sa opisyal na pahayag, kinilala ng pamahalaang panlalawigan ang dinanas ng pamilya at iginiit na bawat Romblomanon ay karapat-dapat sa mabilis, maayos, at makataong serbisyong pangkalusugan, anuman ang kalagayan ng ospital.
Batay sa inisyal na imbestigasyon, nagkaroon umano ng pagkaantala sa paglabas ng reseta dahil sa dagsa ng mga kritikal at life-threatening na kaso sa Emergency Room na kinailangang unahin ng mga doktor. Ipinaliwanag din na ang naging aksyon ng nursing staff ay bahagi ng health protocols upang maprotektahan ang ibang pasyente laban sa posibleng pagkalat ng nakahahawang sakit.
Nag-ugat ang pahayag ng pamahalaan sa isang social media post na naglahad ng karanasan ng pamilya ng isang 9-anyos na bata na dinala sa RPH noong Enero 5, 2026.
Ayon sa viral post, naghintay umano ang pamilya sa labas ng emergency room habang wala pa ang doktor at nakaranas ng hindi kanais-nais na pakikitungo, kabilang ang pagbanggit na nakahahawa ang sakit ng bata at ang matagal na paghihintay sa reseta, na umano’y nagdulot ng emosyonal distress sa pasyente.
Kasabay nito, nanawagan ang pamahalaan ng pag-unawa at respeto sa mga health worker na patuloy na nagsisilbi sa gitna ng pagod at kakulangan sa tao, habang hinihikayat naman ang publiko na maghain ng opisyal na reklamo sa tanggapan ng Pamahalaang Panlalawigan o sa pamunuan ng RPH upang mas mabilis at epektibong matugunan ang mga kahalintulad na insidente.
Ayon sa Pamahalaang Panlalawigan, magsisilbing aral ang insidenteng ito upang higit pang pagbutihin ang serbisyo at sistema ng komunikasyon sa Romblon Provincial Hospital.
