Nanawagan si Governor Trina Firmalo-Fabic ng agarang pagkilos at mas maayos na koordinasyon sa pagitan ng mga shipping companies, Philippine Ports Authority (PPA), at Philippine Coast Guard (PCG) kasunod ng pagka-stranded ng daan-daang pasaherong pauwi ng Romblon noong Christmas holiday, partikular sa Lucena Port.
Sa kanyang pahayag sa flag-raising ceremony nitong unang Lunes ng 2026, iginiit ng gobernador na hindi na dapat maulit ang ganitong sitwasyon tuwing peak season.
Ayon sa kanya, maraming Romblomanon ang labis na nahirapan dahil sa kakulangan ng biyahe at maayos na sistema sa mga pantalan, kung saan may mga pasaherong napilitang maghintay sa labas ng pier at magpalipas ng gabi sa kabila ng masamang panahon.
Binanggit din ni Firmalo-Fabic na isa sa mga ugat ng problema ang kakapusan ng espasyo sa Lucena Port, dahilan upang hindi makapasok sa terminal ang mga pasaherong walang hawak na tiket. Dahil dito, lalo umanong naging mabigat ang kalagayan ng mga biyaherong umuuwi para sa Pasko.
Nanawagan ang gobernador sa Office of the Vice Governor at sa Sangguniang Panlalawigan na suportahan ang mga hakbang na magbibigay ng pangmatagalang solusyon, kabilang ang posibilidad ng pagpasa ng mga ordinansa o kaukulang polisiya. Isa sa mga tinitingnang hakbang ang pagmamandato ng online ticketing system para sa mga shipping lines upang maging mas maayos at patas ang bentahan ng tiket at maiwasan ang siksikan at kalituhan sa mga pantalan.
Dagdag pa ng gobernador, mahalaga ring masigurong may nakahandang special trips tuwing peak season upang hindi na muling maranasan ng mga pasahero ang pagkaantala at paghihirap sa pag-uwi sa probinsya.
Giit ni Firmalo-Fabic, hindi katanggap-tanggap na patuloy na dumanas ng ganitong kalagayan ang mga Romblomanon, kaya’t kailangan ang maagap at sama-samang aksyon ng mga ahensya at sektor na may kinalaman sa sea transport upang matiyak ang maayos, ligtas, at makataong biyahe ng publiko.
