Inanunsyo ni Pangulong Ferdinand R. Marcos Jr. na magbibigay ang Social Security System (SSS) ng emergency loan sa mga miyembro ngayong Disyembre upang agad silang matulungan sa pagbili ng mga pangunahing pangangailangan.
“Simula itong Disyembre na ito ay makakapagbigay na ang SSS ng tinatawag na emergency loan dahil habang nasa ilalim halimbawa ng national emergency ay magbibigay ng emergency loan ang SSS,” sinabi ni Pangulong Marcos sa isang video message nitong Huwebes.
“Magagamit po ninyo itong loan na ito para sa inyong pangangailangan lalo na kagaya ng aking nabanggit ay pagka emergency, ito po ang makukuha ninyo sa SSS,” dagdag pa ng Pangulo.
Ayon sa Pangulo, ang pautang ay may mababang interes na 7 percent lang, at may anim na buwang palugit para simulan ang pagbabayad.
“Ibig sabihin, pagtanggap ninyo ng loan galing sa SSS, sa unang anim na buwan hindi kayo kailangan magbayad para sa loan amortization para naman mapagaan ang inyong dala,” ayon sa Pangulo.
Patuloy na nakikipag-ugnayan ang Pangulo sa SSS upang makahanap ng mas ligtas at makatarungang alternatibong micro loan at emergency loan para sa mga Pilipino.
Dagdag pa ng punong ehekutibo, patuloy na nakikipag-koordinasyon ang administrasyon sa SSS para makakita pa ng mas maayos at patas na alternatibong micro at emergency loans para sa mga Pilipino.
“Maganda po ito kasi imbes na pupunta po kayo sa ‘5-6' at mapasubo sa malalim na utang ay mayroon na kayong magagamit at ang babayaran lang ay seven percent lamang. Kaya sana ito ay makatulong po sa inyong lahat,” ayon sa Pangulo, na tinukoy ang mapagsamantalang sistema ng pautang na kadalasang takbuhan ng mga pamilyang mababa ang kita.
Noong Nobyembre 6, idineklara ni Pangulong Marcos ang isang taong state of national calamity sa ilalim ng Proclamation No. 1077 bilang tugon sa malawakang pinsala mula sa mga kalamidad at paghahanda sa mga darating na sakuna. | PND
