Sabay-sabay na na-promote ang kabuuang 1,436 na guro sa lalawigan ng Romblon sa ilalim ng Expanded Career Progression (ECP) System ng Department of Education (DepEd).
Ang Expanded Career Progression ay isang sistema ng promosyon na nagbibigay-daan sa mga guro na ma-reclassify at maitaas ang ranggo batay sa kanilang kwalipikasyon, karanasan, at natamong propesyonal na pamantayan, nang hindi na kailangang maghintay ng bakanteng posisyon o pagreretiro ng iba.
Ayon kay Romblon Schools Division Superintendent Roger F. Capa, pumangalawa ang Romblon sa rehiyon ng MIMAROPA sa may pinakamaraming guro na na-endorso at nirekomendahan para sa reclassification sa ilalim ng ECP.
Sa panayam ng PIA Romblon, ipinaliwanag ni Capa na naging matagumpay ang implementasyon ng ECP sa lalawigan dahil sa maayos na information dissemination na isinagawa ng DepEd Romblon, kabilang ang serye ng orientation na nagbigay-linaw sa mga guro hinggil sa proseso at benepisyo ng programa. Dahil dito, marami ang nahikayat na magsumite ng aplikasyon.
Aniya, sa pamamagitan ng ECP ay natupad ang matagal nang hangarin ng maraming guro na umangat sa kanilang posisyon at ma-promote, hindi gaya noon na kinakailangan pang maghintay ng mabakanteng item bago magkaroon ng promosyon. Dagdag pa niya, sa ilalim ng ECP ay wala umanong kompetisyon sa pagitan ng mga guro dahil ang batayan ay ang sariling kwalipikasyon ng bawat aplikante. Kapag pasado sa pamantayan, awtomatikong mare-reclassify ang item at maipatutupad ang promosyon.
Ipinaliwanag din ni Capa na malaking tulong ang ECP sa pagpapabuti ng kapakanan ng mga guro dahil kaakibat nito ang pagtaas ng sahod, mas maayos na posisyon, at mas matibay na seguridad sa propesyon. Kapag may kapanatagan at dignidad sa trabaho ang mga guro, mas nagiging buo ang kanilang lakas at dedikasyon sa pagtuturo.
Bilang Schools Division Superintendent, nagpahayag si Capa ng pasasalamat at pagpupugay sa mga guro ng Romblon na patuloy na nagsisilbi nang may puso, integridad, at malasakit sa kabila ng mga hamon sa propesyon.
Tiniyak din ni Capa na ipagpapatuloy ng DepEd Romblon ang pagpapatupad ng Expanded Career Progression System upang mabigyan ng pagkakataon ang iba pang mga guro, lalo na ang mga matagal nang nasa serbisyo, na hindi pa naisama sa kasalukuyang batch ng mga na-promote.
