Iuurong ng Land Transportation Office (LTO) sa Enero 2, 2026 ang pagpapatupad ng pagbabawal sa pagdaan ng mga electric bicycle (e-bike), electric tricycle (e-trike), at iba pang light electric vehicles (LEV) sa mga national highway, ayon kay LTO Chief Assistant Secretary Markus Lacanilao sa isang video statement nitong Linggo.
Ayon kay Lacanilao, ang hakbang ay para bigyan ng sapat na panahon ang publiko na maunawaan ang mga bagong alituntunin, habang pinaplantsa ng ahensya ang malinaw na guidelines kung saan lamang maaaring bumiyahe ang mga LEV.
“There will be no impounding operation for the time being while we implement a comprehensive information drive,” pahayag ni Lacanilao, na sinabing maglalagay ng LTO enforcers sa mga pangunahing kalsada simula Lunes upang magpaliwanag, hindi manghuli.
Maglalabas din umano ang LTO ng updated na panuntunan na magtatakda ng malinaw na delineation kung aling mga kalsada ay ipinagbabawal para sa LEVs at alin ang papayagan.
Gayunman, pagpasok ng Enero 2, ay uumpisahan na ang mahigpit na pagpapatupad at posibleng impounding ng mga lalabag.
Giit ni Lacanilao, ang layunin ng ahensya ay hindi para pahirapan ang mga gumagamit ng e-bikes at e-trikes, kundi para tiyaking ligtas ang lahat ng motorista sa kalsada.
Nauna nang sinabi ng LTO na ang pagbabawal ay bunga ng pagdami ng aksidenteng kinasasangkutan ng mga e-bikes at e-trikes sa mga pangunahing lansangan.
