Nanawagan ang Department of the Interior and Local Government (DILG) sa mga lokal na pamahalaan na magpatupad ng mas mahigpit na precautionary measures kaugnay ng posibleng pagbaha at pagguho ng lupa na dala ng Bagyong Nando at pinalakas na Southwest Monsoon.
Ayon sa pinakahuling abiso ng PAGASA, nasa panganib ang mga urbanisadong lugar, mabababang komunidad, gayundin ang mga nasa tabing-ilog at bulubunduking bahagi ng bansa. Batay sa tala ng Mines and Geosciences Bureau (MGB), mahigit 2,700 barangay sa buong bansa—kabilang ang 930 sa Metro Manila—ang nasa listahan ng mga lugar na posibleng tamaan ng pagbaha at landslide mula Setyembre 20 hanggang 23.
Hinimok ng DILG ang mga gobernador, alkalde, at barangay officials na magpatupad ng preemptive evacuation sa mga komunidad na mataas ang panganib, bantayan ang mga ilog at gilid ng bundok, magpatuloy sa paglilinis ng mga daluyan ng tubig, at tiyakin ang kaligtasan ng mga kalsada malapit sa landslide-prone areas.
“With the combined effects of Nando and the recent rains from Tropical Depression Mirasol, some areas are now facing compounded hazards. We strongly urge LGUs to remain vigilant and proactive to protect lives and property,” pahayag ng DILG.
Binigyang-diin pa ng ahensya na kahit mga barangay na wala sa opisyal na risk list ay maaari pa ring maapektuhan, lalo na ang mga nasa tabi ng delikadong lugar. Maglalabas ng updated advisories ang PAGASA depende sa magiging pagbabago sa forecast ng ulan.
“All local chief executives must ensure that preparedness actions are in place and that residents are fully informed of potential risks in their communities,” dagdag ng DILG.
