Nakatanggap na ng provisional authority to operate mula sa Energy Regulatory Commission (ERC) ang Tablas Island Electric Cooperative (TIELCO) at SUWECO Tablas Energy Corporation (STEC) para gamitin ang bagong planta ng huli sa sa bayan ng San Agustin bilang karagdagang pinagkukunan ng kuryente para sa Tablas Island.
Ito ang ibinahagi ni Dennis Alag, General Manager ng TIELCO, sa ginanap na Kapihan sa PIA Romblon nitong Martes, August 26.
Ayon kay Alag, lumalampas na sa limit ng kasalukuyang 9.375 megawatts na kontrata ang enerhiyang kinakailangan sa isla. Bilang tugon, humiling ang dalawang kompanya sa ERC na dagdagan ang kapasidad ng kontrata ng 13.7 megawatts.
“Sa kasalukuyan, meron na tayong peak demand na 12 megawatts, kulang na kulang ‘yung approve sa atin na 9.375 megawatts,” ayon kay Alag.
Dagdag nito, malaking tulong ang bagong planta sa pagpapanatili ng tuloy-tuloy na serbisyo ng kuryente sa mga residential at komersyal na lugar ng Tablas Island.
Inaasahang sa ikalawang linggo ng Setyembre ay pormal nang bubuksan ang planta na kayang magbigay ng 5.3 megawatts sa TIELCO.
Bukod sa planta sa San Agustin, may mga kaparehong pasilidad din na itatayo sa mga bayan ng Alcantara at Santa Fe, na inaasahang mapapagana bago matapos ang 2026.
Sa huling datus ng TIELCO, umabot na sa 54,343 kabahayan sa Tablas Island ang mayroon nang suplay ng kuryente hanggang Hulyo ngayong taon. Batay sa datos ng Philippine Statistics Authority (PSA), nasa 56,942 ang kabuuang bilang ng mga bahay na posibleng mapailawan sa isla.
Ayon kay Alag, patuloy ang hakbang ng pamahalaan katuwang ang kooperatiba upang matiyak na bago sumapit ang 2028 ay maaabot ang layunin na mabigyan ng kuryente ang lahat ng kabahayan sa Tablas Island.
