Inatasan ng Commission on Audit (COA) ang pagsasagawa ng isang fraud audit sa mga proyekto ng flood control ng Department of Public Works and Highways (DPWH) sa Bulacan na nagkakahalaga ng P44 bilyon, matapos ilantad ni Pangulong Ferdinand Marcos Jr. ang mga isyung may kaugnayan sa mga ito.
Nabatid na mula sa kabuuang pondong P548 bilyon na inilaan para sa flood control projects sa buong bansa, ang Central Luzon ang tumanggap ng pinakamalaking halagang P98 bilyon, kung saan ang Bulacan ang may pinakamaraming proyekto sa rehiyon.
Ayon sa isang COA memorandum noong August 12, agad na ipinag-utos ang pag-iimbestiga para sa mga pondong ito, bunga ng mga isyung ibinahagi ni Pangulong Marcos. Inatasan din ang mga distrito ng DPWH sa rehiyon na magsumite ng mga dokumento na kakailanganin para sa gagawing audit.
Noong August 11, ipinaliwanag ng Pangulo na ang Bulacan ay may pinakamaraming flood control projects, umabot ito sa 668 proyekto. Ito ay bagamat itinuturing pa rin na isang lalawigan na madalas bahain batay sa National Adaptation Plan para sa 2023–2025.
Samantala, inalam at pinadalhan din ng paliwanag ni President Marcos si Timothy Construction Corporation matapos nitong personal na inspeksyunin noong Agosto 15 ang isang proyekto sa Calumpit, Bulacan.
Nadiskubre na hindi pa tapos ang river protection structure sa nasabing lugar, sa kabila ng ulat na nakumpleto na ito noong Pebrero 2023.
