Patuloy ang pagpapatupad ng administrasyong Marcos sa mga digital infrastructure projects na layong isara ang digital divide at gawing sentro ng inobasyon ang Pilipinas sa rehiyon, alinsunod sa kanyang mga pangako sa 2024 State of the Nation Address (SONA).
Sa kanyang talumpati noong 2024, ipinangako ni Pangulong Ferdinand R. Marcos Jr. ang pagpapalawak ng libreng Wi-Fi sa buong bansa at ang pagpapatupad ng mga reporma upang mapabilis ang pagtatayo ng mga imprastruktura gaya ng common towers.
“Patuloy pa ang ating pinararaming mga libreng Wi-Fi sa buong bansa… Expect full government support to ensure the successful completion of this critical project,” ani Marcos sa SONA.
Isa sa mga katuparan nito ay ang paglulunsad ng 32 libreng Wi-Fi hotspots ng Department of Information and Communications Technology (DICT) sa 11 lugar sa Oriental Mindoro, na nagbibigay ng digital access sa mga komunidad na dating walang koneksyon sa internet.
Ayon kay DICT MIMAROPA Regional Director Emmy Lou Delfin, target pa nilang magdagdag ng 40 lokasyon sa rehiyon, kabilang ang tig-10 hotspot sa Romblon, Occidental Mindoro, Marinduque, at Palawan sa mga susunod na buwan.
Noong Hunyo 20, binuksan din ng DICT ang kauna-unahang Level II Digital Transformation Center sa Calapan City, na magsisilbing hub para sa ICT training ng mga LGU, ahensya ng gobyerno, at mga mamamayan.
Sa World Summit on the Information Society (WSIS) Prizes 2025 sa Geneva, Switzerland noong Hulyo 7, dalawang proyekto mula MIMAROPA ang pinarangalan. Occidental Mindoro ang nanalo sa E-business category dahil sa digitalization ng business permitting system na binago ang proseso mula “weeks to minutes.” Samantala, kabilang sa Top 5 Champion ang Oriental Mindoro para sa Project PAG-ASA, isang digital skills training program para sa mga Persons Deprived of Liberty (PDLs), bilang pagkilala sa social impact ng inclusive digital education.
Binanggit din ng Pangulo sa kanyang SONA ang National Fiber Backbone na layong palakasin ang internet connectivity sa buong bansa. Aniya, operational na ang Phase 1 ng proyekto habang nagpapatuloy ang Phases 2 at 3 na target matapos pagsapit ng 2026. “This fiber backbone will give us sufficient capacity in terms of bandwidth,” ani Marcos.
Sa tuloy-tuloy na mga hakbang na ito, isinusulong ng administrasyon ang mas inklusibong digital transformation—hindi lamang para sa urban centers kundi maging sa mga malalayong lalawigan gaya ng Romblon.
