Ipinakita ng Department of Science and Technology (DOST) kung paano nakatutulong ang agham, teknolohiya at inobasyon (STI) sa pag-angat ng buhay at pagpapalakas ng kakayahan ng mga komunidad sa pamamagitan ng 2025 Regional Science, Technology and Innovation Week (RSTW) na ginanap mula Mayo 28 hanggang 30 sa Occidental Mindoro State College Gymnasium.
Sa temang “Building Smart and Sustainable Communities” itinampok ng DOST-MIMAROPA ang malawak nitong mga programa na tumutugon sa mga isyung may kinalaman sa suplay ng malinis na tubig, seguridad sa pagkain, kahandaan sa sakuna at suporta sa kabuhayan, lalo na sa mga liblib at hindi naaabot na lugar sa rehiyon.
Ayon kay DOST Secretary Renato Solidum Jr., mahalaga ang pamumuhunan sa lokal na inobasyon upang maisulong ang inklusibong pag-unlad.
“Pinalalakas natin ang kapasidad ng kanayunan at binibigyang suporta ang mga solusyong mula sa mismong mamamayan upang sila’y ganap na makibahagi sa kaunlaran ng bansa,” ani Solidum sa pagbubukas ng programa.
Kabilang sa mga tampok na proyekto ang solar-powered water systems sa mga liblib na barangay, mga iskolarsyip sa agham, modernisasyon ng maliliit na negosyo at mga makabagong kasangkapan para sa climate-resilient farming. Sa Occidental Mindoro pa lamang, nakikinabang na ang daan-daang residente sa mga desalination unit at rainwater harvesters, kabilang na ang mga katutubo at mga komunidad sa isla.
Pinuri rin ni Solidum ang mga likhang lokal tulad ng Utak/Itak, isang improvised blower na likha ng mga panday sa Occidental Mindoro, at ang mga STI-based na inisyatibo gaya ng smart irrigation system at seaweed-based fertilizer na nagpapataas ng ani habang nakakatipid sa likas na yaman.
Para naman sa edukasyon, nag-install ang DOST ng 166 STARBOOKS digital libraries sa buong MIMAROPA at namahagi ng daan-daang iskolarsyip sa mga estudyanteng kumuha ng kursong agham. Marami sa kanila ay piniling mag-aral sa loob ng rehiyon.
Itinampok din ang mga inisyatibo sa disaster risk reduction gaya ng hazard maps, teknolohiyang panubaybay sa pagbaha at mobile kitchen na ginagamit tuwing kalamidad. Binanggit ang Project MOSES, isang IoT-based weather at soil monitoring system mula sa Mindoro State University, bilang makabagong solusyon sa maagang babala.
Nagtampok ang RSTW ng mga interactive exhibit, career talk at demo ng teknolohiya upang itaguyod ang STI bilang landas patungo sa patas at sustenableng kaunlaran. Ang pagdiriwang ay bahagi ng kampanya ng DOST na OneDOST4U, na layuning gamitin ang inobasyon para sa kabutihang panlipunan, paglikha ng yaman, proteksyon at pagpapanatili ng likas na yaman.
