Tumanggap ng tulong mula sa Bureau of Fisheries and Aquatic Resources (BFAR) ang halos 100 maliliit na mangingisda mula sa mga bayan ng Odiongan at Looc sa lalawigan ng Romblon sa pamamagitan ng programang Fuel Subsidy Assistance na isinagawa noong Mayo 27 at 28, 2025.
Personal na dumalo at nanguna sa pamamahagi ng ayuda si BFAR MIMAROPA Regional Director Roberto Abrera kasama si 2025 Regional Fisherfolk Director Pelagio Quilaton Jr., na parehong tumungo sa lalawigan upang makiisa sa nasabing aktibidad.
Ang naturang programa ay bahagi ng patuloy na inisyatiba ng pamahalaan upang matulungan ang sektor ng pangisdaan na patuloy na humaharap sa mga hamon ng pagtaas ng presyo ng krudo at iba pang pangunahing bilihin.
Maliban sa fuel subsidy, ang Samahan ng Mangingisda ng Canduyong ay pinagkalooban din ng payao set o fish aggregating device.
Sa isang panayam, binigyang-diin ni Fisherfolk Director Quilaton ang kahalagahan ng tulong na ito sa mga maliliit na mangingisda na umaasa lamang sa pang-araw-araw na huli para mabuhay ang kanilang pamilya.
Hinimok din niya ang mga benepisyaryo na gamitin nang responsable ang natanggap na subsidiya upang mapalago ang kanilang hanapbuhay, masuportahan ang kanilang pamilya, at makapag-ambag sa seguridad sa pagkain ng kanilang komunidad.
Nagpahayag naman ng pasasalamat ang mga nakatanggap ng ayuda. Ayon sa kanila, malaking ginhawa ito lalo na sa panahon ng mataas na gastusin sa gasolina na pangunahing kailangang-kailangan sa kanilang araw-araw na operasyon.
Sa talumpati naman ni BFAR MIMAROPA Regional Director Abrera sa Odiongan, ipinahayag nito ang patuloy na commitment ng BFAR sa pagpapalakas ng kapasidad ng mga mangingisda sa MIMAROPA.
Ang pamamahaging ito ay nataon din sa selebrasyon ng Farmers and Fisherfolk’s Month ngayong Mayo, isang pagkilala sa mahalagang papel ng sektor ng agrikultura at pangisdaan sa pambansang ekonomiya at seguridad sa pagkain.
