Sa nalalapit na National at Local Elections, muling nananawagan ang Commission on Elections (COMELEC) sa mga Pilipino na aktibong gampanan ang kanilang karapatang bumoto at maging mapanuri sa pagpili ng mga pinuno ng bayan.
Sa Kapihan sa PIA Romblon noong Abril 29, binigyang-diin ni Romblon Provincial Election Supervisor Atty. Ryan Santos ang kahalagahan ng bawat boto sa paghubog ng kinabukasan ng bansa.
“Kung gusto natin ng tunay na pagbabago, lumabas tayo at bumoto,” ani Santos.
“Iboto po natin kung ano yung sinasabi ng konsensya natin na tama… Makinig tayo sa plataporma ng mga kumakandidato, personal natin itong suriin, at pagkatapos, piliin natin ang sa tingin natin ay karapat-dapat na mamuno sa ating lokalidad,” dagdag nito.
Binanggit din ni Santos na hindi sapat ang pagboto base sa uso o sa sinasabi ng iba. Sa halip, hinikayat niya ang publiko na maging kritikal sa pagtimbang sa mga plataporma at kakayahan ng mga kandidato.
Dagdag pa ni Santos, mas pinaigting ng COMELEC ang kanilang voter education campaign upang masigurong may sapat na kaalaman ang bawat botante.
“Bukod sa pagpaparehistro, meron po kaming mga voter education campaigns. Pinapakalat po namin lahat ng mga dapat malaman patungkol sa eleksyon para naman ma-exercise natin ‘yung ating constitutionally granted right of suffrage,” paliwanag niya.
Patuloy ang panawagan ng COMELEC sa mga kwalipikadong mamamayan na lumahok sa demokratikong proseso, sapagkat bawat boto ay may malaking epekto sa kinabukasan ng kanilang komunidad at ng buong bansa.
Ang National at Local Elections ay gaganapin sa Mayo 12, 2025.
