Isang makasaysayang hakbang para sa Philippine Coast Guard (PCG) ang pagkakatalaga kay Captain Noemie Guirao-Cayabyab PCG bilang kauna-unahang babaeng tagapagsalita ng ahensiya, ayon sa opisyal na pahayag ng PCG nitong Abril.
Si Captain Cayabyab, isang kilalang opisyal mula Romblon at miyembro ng CGOC “SANDIWA” Class 07-05, ay kinilala sa kanyang dedikasyon, kahusayan, at malawak na karanasan sa larangan ng maritime safety, security, at personnel management — mga katangiang naging daan upang siya’y italaga sa bagong papel bilang mukha at boses ng PCG.
Simula ngayong araw, si Capt. Cayabyab ang mamumuno sa mga komunikasyon kaugnay ng mahahalagang inisyatibo ng Coast Guard, magsisilbing kinatawan ng organisasyon sa mga pambansa at pandaigdigang usapin, at tagapagtaguyod ng mga adbokasiyang patungo sa mas inklusibo at progresibong kinabukasan.
Ayon kay PCG Commandant Admiral Ronnie Gil L. Gavan PCG, ang pagtatalaga kay Capt. Cayabyab ay patunay ng matibay na paninindigan ng organisasyon sa pagsusulong ng gender equality at sa pagpapalakas ng papel ng kababaihan sa hanay ng pamunuan. Aniya, ang patuloy na pag-angat ng kababaihan sa mga posisyong pamunuan sa PCG ay bunga ng dekada-dekadang pagsusumikap, pagpapatibay ng sarili, at pagbasag sa mga hadlang.
Bago ang bagong tungkulin, si Capt. Cayabyab ay nagsilbing Deputy Chief of Coast Guard Staff for Education and Training (CG-12) at naging instrumental sa pagbuo ng PCG Pension and Gratuity Management Center (ngayon ay RBAS). Naging Commander din siya ng Vessel Safety Service Unit, kung saan kanyang pinangasiwaan ang rebisyon ng Pre-Departure Inspection Checklist para sa mga domestic vessel.
Bukod sa mga operasyonal na gawain, taglay rin ni Capt. Cayabyab ang husay sa akademya. Siya ay Dean’s Lister noong kolehiyo at iginawad sa kanya ang Dean’s Award bilang natatanging mag-aaral sa kursong Master of Policy Studies in Maritime Safety and Security Policy sa GRIPS, Tokyo, Japan noong 2021. Siya rin ang nag-iisang Filipina at Coast Guard officer sa kanyang batch na ginawaran ng naturang karangalan.
Sa kasalukuyan, nagsisilbi rin siyang Regional Incident Command System CADRE para sa CALABARZON.
Si Capt. Cayabyab ay asawa ng kapwa opisyal ng Coast Guard, si Captain Jerome T. Cayabyab PCG. Ang kanyang pagtatalaga bilang tagapagsalita ay hindi lamang tagumpay ng isang indibidwal, kundi simbolo rin ng patuloy na pag-unlad ng kababaihan sa serbisyo publiko — isang huwarang Romblomanon at babaeng lider na dapat ipagmalaki ng buong bansa.
