Marami ang natuwa sa balita na may byaheng Masbate-Sibyan-Batangas na ang KHO Shipping Lines. Oo nga naman, malaking ginhawa ito sa mga Romblomanons, lalong-lalo na sa mga taga Sibuyan island.
What about kung may byaheng Odiongan – Puerto Princesa (Palawan) at vice versa? Tiyak, marami rin ang masisiyahan hindi lang mga Romblomanons na nais maging turista sa Palawan, o kaya mga taga Palawan naman na nais magbisita sa Romblon. Alam nating lahat na popular ang Palawan sa mga sariwang yamang-dagat at mga magagandang tourists destinations nito, katulad halimbawa ng Underground River, Honda Bay, Bakers Hill, Mitra Farm at iba pa sa Puerto Princesa, at kung lalayo ng konti mula sa syudad patungong El Nido ay tiyak na mag eenjoy ka sa ganda at mala crystal na tubig dagat, island hopping, at snorkling. Eh mas lalo na siguro sa Coron na dayuhin ng mga artista hindi lang ng Pilipinas kundi maging ng Hollywood.
Sa kabilang banda naman, maipo-promote din natin ang ating mga magagandang attractions, at magbubukas din ito ng oportunidad para diskubrehin pa natin ang potential ng ating mga bayan sa turismo.
Hindi lang sa punto ng turismo, maging sa usaping pang komersiyo, pangangalakal, import at export ng kani-kaniyang mga produkto, tiyak na magbubukas ng malaking oportunidad sa merkado at negosyo kapag nagkaroon ng byahe ng barko mula Odiongan-Puerto Princesa (Palawan) at vice versa. Samakatuwid, parehong makikinabang ang dalawang lalawigan dito.
Kung inyong matatandaan, noong 2016 ay sinubukan na rin sana ng Montenegro Shipping Lines Inc. na magkonekta ng byahe patungong Palawan, pero hindi rin ito natuloy. Dahil nga sa ang nasabing operasyon ay pribado, natural na nakasalalay una sa feasibility ang operasyon nito. Kaya nga siguro hindi rin natuloy ang tangka sana noon na magkonekta sa Palawan mula Odiongan ay dahil baka wala ring pasahero.
Sa ngayon, ang pinakamabilis na paraan para makarating ng Palawan ay ang mag eroplano. Ang kaso, hindi rin regular ang flight ng eroplano sa Tablas island, maliban sa may kamahalan ang pasahe rito. Kaya mas mainam sana kung may barko direkta mula Odiongan patungong Puerto Princesa, dahil maaari mo pang dalhin ang sasakyan mo kung meron man para magamit sa pag-iikot mo sa Palawan.
Siguro panahon na para muling silipin ng mga shipping lines ang posibilidad ng pagkakaroon ng direktang byahe ng barko mula Odiongan – Puerto Princesa City (Palawan) at vice versa. Dahil nga sa ito ay pribadong operasyon, ang maaaring gawin ng mga lokal na opisyal ng probinsya ng parehong lalawigan ay pag-usapan at hikayatin ang shipping lines na isama ito sa kanilang ruta.
Kung bubuksan nga ba ang direktang byahe ng barko mula Odiongan – Puerto Princesa City sa Palawan, game ka ba?
