Arestado sa Lipa City sa Batangas ang isang 35-anyos na mekaniko na kabilang sa mga most wanted person sa Romblon, sa bisa ng warrant of arrest kaugnay ng kasong paglabag sa Anti-Carnapping Act of 2016.
Ayon sa Romblon Police Provincial Office, isinagawa ang pag-aresto dakong alas-9:10 ng umaga nitong November 1 sa B. Morada Avenue, Barangay 1, Lipa City.
Pinangunahan ito ng San Andres Municipal Police Station, katuwang ang Lipa Component City Police Station ng Batangas Police Provincial Office.
Inilabas ang warrant noong Oktubre 29, 2026 ng Regional Trial Court, Fourth Judicial Region, Branch 82 sa Odiongan, Romblon. Kaugnay ito ng kasong paglabag sa Section 3 ng Republic Act No. 10883 o Anti-Carnapping Act of 2016. Itinakda ang ₱300,000 na piyansa para sa pansamantalang kalayaan ng akusado.
Matapos arestuhin, inilagay ang suspek sa kustodiya ng Lipa Component City Police Station para sa dokumentasyon at iba pang proseso.
Nakatakda siyang dalhin sa San Andres, Romblon, para iharap sa korte.
