Pinalawak ng Land Transportation Office (LTO) Romblon District Office ang kaalaman ng mga tricycle driver sa ligtas at responsableng pagmamaneho sa pamamagitan ng isinagawang Road Safety and Defensive Driving lecture para sa mga miyembro ng Tricycle Operators and Drivers Association (TODA) sa bayan ng Romblon.
Layunin ng pagsasanay na palakasin ang disiplina at kamalayan ng mga drayber sa kanilang responsibilidad sa kalsada, gayundin ang pag-iwas sa mga aksidente upang mapangalagaan ang kaligtasan ng mga pasahero at iba pang gumagamit ng lansangan.
Isinagawa ang aktibidad sa pakikipagtulungan ng Lokal na Pamahalaan ng Romblon bilang bahagi ng patuloy na pagsusulong ng road safety education sa mga sektor ng pampublikong transportasyon.
Nagpaabot naman ng pasasalamat ang LTO Romblon District Office sa lokal na pamahalaan sa pagkukusa at suporta nito sa pagsasagawa ng programa.
Inaasahang makatutulong ang ganitong mga pagsasanay sa pagpapaigting ng responsableng pagmamaneho at pagsusulong ng mas ligtas na transportasyon sa bayan ng Romblon.


























