Nagsagawa ng clearing operations ang mga tauhan ng Romblon Electric Cooperative at Provincial Engineering Office matapos gumuho ang lupa at bumara ang mga debris sa bahagi ng kalsada sa Barangay Capaclan, Romblon, Romblon nitong Sabado ng umaga.
Ayon sa ulat, dulot ang landslide ng tuloy-tuloy at malakas na pag-ulan madaling araw ng Sabado na kaugnay ng thunderstorm. Nagpalambot ang ulan sa lupa na naging sanhi ng pagguho nito at pagbara sa kalsada.
Agad na nagtulong-tulong ang mga tauhan ng dalawang tanggapan upang alisin ang mga debris at lupang humarang sa daanan at maisagawa ang clearing operations.
Wala namang naitalang nasaktan sa insidente.
Samantala, mainit na ang panahon na nararanasan sa bayan matapos ang malakas na pag-ulan.
