Nagsagawa ang Romblon Police Provincial Office (PPO) ng child protection lecture at outreach activity sa San Jose Elementary School sa Barangay Agtongo, Romblon, Romblon noong July 29 bilang bahagi ng pagdiriwang ng 31st Police Community Relations (PCR) Month.
Pinangunahan ni Lt. Col. Ledilyn Ambonan, Chief ng Police Community Affairs and Development Unit, kasama ang mga tauhan ng Romblon Municipal Police Station, ang aktibidad na nagsilbing pre-launch ng PROJECT SAFER KIDS – BANTAY BATA 2.0 ng Romblon PPO.
Layunin ng programa na palakasin ang kamalayan ng mga bata, magulang, at komunidad sa pag-iwas at pagtugon sa pang-aabuso, pagsasamantala, at iba pang uri ng gender-based violence sa pamamagitan ng patuloy na edukasyon at pakikipagtulungan sa komunidad.
Sa isinagawang lecture, tinalakay ni PLTCOL Ambonan ang mga paksang Good Touch and Bad Touch, mga hakbang sa kaligtasan ng mga bata, Republic Act No. 8353 o ang Anti-Rape Law of 1997, tamang paraan ng pag-uulat ng mga insidente, at iba pang impormasyon kaugnay ng kampanya ng Philippine National Police laban sa gender-based violence.
Kasunod ng lecture, namahagi ang Romblon PPO ng school supplies sa 85 mag-aaral mula Kindergarten hanggang Grade 3, habang humigit-kumulang 50 pares ng tsinelas ang ipinamahagi sa mga mag-aaral mula Grade 4 hanggang Grade 6. Nabigyan din ng meryenda ang lahat ng lumahok sa aktibidad.
Mainit namang tinanggap ng pamunuan ng San Jose Elementary School, mga guro, magulang, at mga mag-aaral ang programa, na anila'y makatutulong sa pagpapalakas ng kamalayan at proteksyon ng mga bata laban sa iba't ibang anyo ng pang-aabuso.
Ayon kay Romblon PPO Provincial Director PCOL Rexton F. Sawi, mahalaga ang maagang edukasyon at pakikipagtulungan ng komunidad upang maprotektahan ang mga bata laban sa karahasan.
“Protecting children begins with educating them, empowering parents and teachers, and strengthening partnerships within our communities. This activity marks the first step toward the launch of PROJECT SAFER KIDS – BANTAY BATA 2.0, a program that reflects our commitment to ensuring every child grows in a safe, secure, and nurturing environment. Together, we can build communities where every child is protected and every voice is heard,” ani Sawi.
Patuloy naman ang Romblon PPO sa pagpapatupad ng mga programang nakatuon sa child protection bilang bahagi ng community-oriented policing strategy ng Philippine National Police.
Discussion about this post