Nakipagpulong ang mga opisyal ng National Commission of Senior Citizens (NCSC) MIMAROPA kay Romblon Lone District Representative Eleandro Jesus “Budoy” Madrona upang talakayin ang mga programa at posibleng pakikipagtulungan para sa kapakanan ng mga nakatatandang mamamayan sa lalawigan.
Pinangunahan ang courtesy call nina NCSC Commissioner Lt. Gen. Ricardo Rainier Cruz, at NCSC MIMAROPA Regional Director Atty. Edwin Dimatatac.
Sa pagpupulong, tinalakay ng mga opisyal ang iba't ibang inisyatiba ng komisyon at mga posibleng hakbang upang mapalakas pa ang paghahatid ng mga serbisyo para sa mga senior citizen sa Romblon.
Kabilang sa mga napag-usapan ang mga programang nakatuon sa kalusugan, kabuhayan, at iba pang serbisyong naglalayong mapabuti ang kapakanan ng mga nakatatandang mamamayan.
Ayon sa tanggapan ni Cong. Madrona, nagsilbi ring pagkakataon ang pagpupulong upang mapag-usapan ang pagpapalawak ng koordinasyon sa pagitan ng NCSC at iba pang ahensya ng pamahalaan para sa pagpapatupad ng mga programa para sa senior citizens.
Binigyang-diin din sa pagpupulong ang kahalagahan ng pagkilala sa ambag ng mga nakatatanda sa kanilang pamilya at komunidad at ang patuloy na pagsusulong ng mga programang nagtataguyod ng kanilang kapakanan, dignidad, at karapatan.
Nagpasalamat naman ang tanggapan ng kongresista sa pagbisita ng mga opisyal ng NCSC MIMAROPA at sa patuloy nitong pagpapatupad ng mga programa para sa sektor ng senior citizens.
Discussion about this post