Tumanggap ang mga lokal na pamahalaan ng Banton at San Fernando sa Romblon ng Special Notice of Compliance (SNOC) mula sa Land Transportation Franchising and Regulatory Board (LTFRB) MIMAROPA matapos maaprubahan ang kanilang mga Local Public Transport Route Plan (LPTRP).
Isinagawa ang awarding ceremony noong Hunyo 4 sa La Marietta Events Place sa Odiongan, Romblon.
Pinangunahan ni LTFRB MIMAROPA Regional Director Enrico Moreno R. Bautista ang aktibidad na dinaluhan din ni Romblon Governor Trina Alejandra Firmalo-Fabic.
Ayon sa LTFRB MIMAROPA, bahagi ng layunin ng pag-apruba sa mga route plan ang pagpapalakas ng local transportation planning at pagsasaayos ng mga pampublikong transportasyon sa mga munisipalidad.
Sinabi rin ng ahensya na makatutulong ang mga naaprubahang LPTRP sa pagtukoy at pagsasaayos ng mga ruta ng pampublikong sasakyan at iba pang pangangailangan sa transportasyon sa antas ng lokal na pamahalaan.
Ang pagkakaloob ng Special Notice of Compliance ay patunay ng pagsunod ng dalawang munisipalidad sa mga itinakdang rekisito ng pambansang pamahalaan kaugnay ng transport planning.
Ang LPTRP ang pangunahing gabay ng mga lokal na pamahalaan sa pagtukoy ng mga ruta, pangangailangan sa serbisyo, at transport demand sa loob ng kanilang nasasakupan.
Ayon sa LTFRB, bahagi ng mga transport modernization initiative ng pamahalaan ang pagbuo at pag-apruba ng mga LPTRP upang mapabuti ang accessibility, kaligtasan, at kahusayan ng pampublikong transportasyon.
Patuloy namang nakikipagtulungan ang LTFRB MIMAROPA sa mga lokal na pamahalaan sa rehiyon para sa pagbuo at pagpapatupad ng mga programang may kaugnayan sa transportasyon at mobility services.
