Isinagawa noong Abril 21 hanggang 23 sa Barangay Lanas, San Jose, Romblon ang workshop para sa pagrebisa ng ortograpiya ng mga wikang Asì, Iní, at Onhán bilang bahagi ng pagpapaunlad at estandardisasyon ng mga katutubong wika sa lalawigan.
Dinaluhan ang aktibidad ng mga gurong manunulat mula sa iba’t ibang bayan at isla ng Romblon na kumakatawan sa tatlong pangunahing wika ng lalawigan.
Isinagawa ang workshop sa pangunguna ng Department of Education Romblon sa pamamagitan ni Jordan D. Solatorio katuwang ang mga mananaliksik mula sa Komisyon sa Wikang Filipino (KWF) na sina Jose Evie G. Duclay, Rolien Mark M. Balisi, at Christian DS. Nayles.
Nagpahayag din ng suporta ang lokal na pamahalaan ng San Jose sa inisyatiba na layong mapanatili at mapaunlad ang mga lokal na wika bilang bahagi ng kultura at pagkakakilanlan ng komunidad.
Sa loob ng tatlong araw na workshop, ginabayan ng mga mananaliksik ang mga kalahok sa pagtukoy ng mga katutubong tunog ng kani-kanilang wika at sa pagbuo ng mga tuntunin sa wastong pagsulat ng Asì, Iní, at Onhán.
Layunin ng aktibidad na makabuo ng malinaw at konsistent na gabay sa paggamit ng mga naturang wika upang magsilbing sanggunian sa pagsusulat, pagtuturo, at iba pang akademikong gamit.
Ayon sa mga organizer, mahalaga ang pagkakaroon ng estandardisadong ortograpiya upang mapalakas ang paggamit ng mga katutubong wika sa edukasyon, lalo na sa pagpapatupad ng mother tongue-based at multilingguwal na pagtuturo sa mga paaralan.
Bahagi ang programa ng proyekto ng KWF sa ilalim ng Sangay ng Lingguwistika, Publikasyon, at Promosyon na nakatuon sa dokumentasyon, pagpapaunlad, at pagsusulong ng mga katutubong wika sa bansa. (PR)
