Nagpasalamat ang ilang magsasaka at mangingisda sa Romblon sa administrasyon ni Pangulong Ferdinand R. Marcos Jr. matapos silang makatanggap ng cash assistance sa ilalim ng Presidential Assistance to Farmers and Fisherfolk Program (PAFFP).
Sa ilalim ng programa, tumanggap ng tig-₱2,325 cash assistance ang mga kwalipikadong benepisyaryo na naapektuhan ng patuloy na pagtaas ng presyo ng langis at operational costs sa sektor ng agrikultura at pangingisda.
Ayon sa mga benepisyaryo, malaking tulong ang ayuda para sa kanilang pang-araw-araw na gastusin, pagbili ng pagkain, at pangsuporta sa kanilang kabuhayan.
Si Luzvizminda Merano, isang magsasaka mula sa Barangay Malilico sa Odiongan, ay nagsabing gagamitin niya ang natanggap na ayuda para sa pagbili ng bigas at iba pang pangunahing pangangailangan ng kanyang pamilya.
Samantala, sinabi naman ni Loreta Solano na malaking tulong ang cash assistance para sa kanilang household expenses, lalo na sa gastusin para sa kanyang mga anak at apo na kasama niyang naninirahan.
Para naman kay Deodosio Atilano Jr., ilalaan niya ang ayuda sa gastusin para sa kanilang palayan at iba pang pangangailangan sa pagsasaka.
Nakinabang din sa programa ang mga mangingisda sa lalawigan na naapektuhan ng mataas na presyo ng produktong petrolyo na ginagamit sa kanilang operasyon sa dagat.
Ayon kay Ricky Alcoran, plano niyang bumili ng lambat gamit ang natanggap na ayuda upang magamit sa kanyang pangingisda.
Samantala, sinabi rin ni Edcel Fetalver na makatutulong ang cash assistance para makabili ng mga kagamitang kailangan sa kanilang fishing activities.
Bahagi ang PAFFP ng ₱10-bilyong programa ng pamahalaan para matulungan ang maliliit na magsasaka at mangingisda na naapektuhan ng pagtaas ng presyo ng langis at iba pang gastusin sa produksyon.
Batay sa tala ng Department of Agriculture, mahigit 15,000 magsasaka at mangingisda sa Romblon ang kabilang sa mga benepisyaryo ng programa.
