Umabot sa 77 bagong botante ang nairehistro ng Commission on Elections (Comelec) sa isinagawang Special Satellite Registration sa Romblon District Jail noong Miyerkules.
Ayon sa pahayag ni Bureau of Jail Management and Penology (BJMP) MIMAROPA spokesperson Jail Officer 3 Joefrie Anglo, kabilang sa mga nagparehistro ang 74 persons deprived of liberty (PDLs) at tatlong jail personnel.
Isinagawa ang aktibidad bilang bahagi ng pagpapalawak ng voter registration services ng Comelec sa MIMAROPA, lalo na para sa mga sektor na may limitadong access sa mga regular na registration sites.
Naging katuwang ng Comelec sa aktibidad ang pamunuan ng Romblon District Jail sa ilalim ni acting Jail Warden Jail Senior Inspector Emely Mallen upang matiyak ang maayos at ligtas na pagsasagawa ng registration sa loob ng pasilidad.
Ayon kay Anglo, ipinapakita ng programa ang layunin ng pamahalaan na mapalawak ang partisipasyon ng lahat ng kwalipikadong mamamayan sa proseso ng halalan, kabilang ang mga nasa custodial facilities.
Dagdag pa niya, naging positibo rin umano ang epekto ng aktibidad sa morale ng mga PDL dahil naipapaalala sa kanila na bahagi pa rin sila ng lipunan at may pagkakataon pa ring makibahagi sa demokratikong proseso.
Binigyang-diin din ng BJMP MIMAROPA ang patuloy nitong suporta sa mga programa ng Comelec, partikular yaong may kaugnayan sa civic participation at reintegration ng mga PDL sa lipunan.
