Nagpasalamat si Romblon Governor Trina Firmalo-Fabic sa AnaKalusugan Partylist at kay Congressman Ray Reyes matapos mag-donate ang mga ito ng food truck para sa lalawigan ng Romblon.
Ayon sa gobernador, gagamitin ang food truck upang palakasin ang feeding program ng pamahalaang panlalawigan at mas mapalawak ang maaabot ng mga nutrition caravan, lalo na sa mga komunidad na nangangailangan ng agarang tulong.
Sinabi ni Fabic na sa pamamagitan ng bagong kagamitan ay mas mapapabilis ang paghahatid ng serbisyo, kabilang ang pamamahagi ng pagkain sa panahon ng sakuna at sa mga malalayong lugar sa lalawigan.
Dagdag pa ng gobernador, patuloy ang naibibigay na suporta ng AnaKalusugan hindi lamang sa mga programang pangkalusugan kundi maging sa ilang proyektong pang-imprastruktura sa lalawigan. Binigyang-diin din niya na bukas ang pamahalaang panlalawigan sa mas pinaigting na pakikipagtulungan sa mga katuwang na organisasyon para sa pagpapatuloy ng mga programang panlipunan sa Romblon.
