Dumalo si Senador Christopher “Bong” Go, na itinuturing na adopted son ng Romblon, sa 1st Philippine Councilor League (PCL) Romblon Chapter Convention 2026 na ginanap noong Marso 10 sa Diamond Hotel Manila, kung saan pinuri niya ang mga lokal na mambabatas sa kanilang aktibong papel sa paglalapit ng serbisyo sa kanilang mga nasasakupan.
Sa kanyang mensahe, kinilala ng senador ang pagsisikap ng mga konsehal na hindi lamang tumuon sa paggawa ng mga ordinansa kundi pati na rin sa direktang pagtugon sa pang-araw-araw na pangangailangan ng mga mamamayan.
“Lahat kayo, mga kapatid ko kasi adopted son ninyo ako. Sa panahon ngayon, napakahalaga na ang ating mga batas ay sumasabay sa pangangailangan ng ating panahon. Malaki po ang aking respeto sa mga konsehal dahil sa araw-araw ninyo na trabaho. You deserve some rest. Tao lang po tayo na kailangan din pong magpahinga kahit papaano,” pahayag ni Go.
Binalikan din ng senador ang kanyang mga naging pagbisita sa lalawigan at muling tiniyak ang kanyang patuloy na suporta sa mga Romblomanon.
“Naka-attend po ako sa palaro ninyo doon sa Romblon noong nakaraang mga taon. Bilang inyong senador, patuloy po akong magseserbisyo sa inyo. Literal na bukas po ang aking opisina para sa inyong lahat at sa abot ng aking makakaya ay magseserbisyo po ako sa inyo,” dagdag pa niya.
Sa naturang pagtitipon, kinilala rin ni Go ang mga opisyal ng PCL Romblon Chapter, kabilang sina President Board Member Mart Silverio, Vice President Councilor Romeo Chua, Secretary General Councilor Menchie Garachico, Treasurer William Tan, Auditor Councilor Zaldy Marin, Public Relations Officer Councilor Nhiesel Teologo, at Business Manager Councilor Unique Muros, pati na ang iba pang miyembro ng board of directors.
Nag-abot din si Go at ang kanyang team ng ilang token sa mga dumalong konsehal bilang pasasalamat sa kanilang serbisyo publiko.
Bilang miyembro ng Senate Committee on Local Government, muling iginiit ng senador ang kanyang suporta sa mga panukalang naglalayong palakasin ang lokal na pamamahala at magbigay ng higit na tulong sa mga opisyal ng barangay at mga frontline worker.
Kabilang sa mga inisyatibang ito ang Republic Act No. 11466, na kanyang co-authored at co-sponsored, na nagbibigay ng salary adjustments sa mga empleyado ng pamahalaan kabilang ang mga healthcare worker.
Naghain din si Go ng Senate Bill No. 197 na naglalayong magbigay ng mga benepisyo sa mga opisyal ng barangay na katulad ng natatanggap ng mga regular na empleyado ng gobyerno kapag ito ay naisabatas.
Patuloy din niyang isinusulong ang Senate Bill No. 412, na kanyang muling inihain sa 20th Congress, na naglalayong gawing institusyonal ang kompensasyon at benepisyo ng mga barangay health worker bilang pagkilala sa kanilang mahalagang papel sa paghahatid ng pangunahing serbisyong pangkalusugan lalo na sa mga komunidad na kulang sa serbisyong medikal.
Bilang Vice Chairperson naman ng Senate Committee on Health, binanggit din ni Go ang kanyang panukalang Senate Bill No. 1289 na naglalayong magtatag ng Level III general hospital sa Oriental Mindoro na tatawaging MIMAROPA Regional Hospital kung maisasabatas.
“Huwag po kayong mag-atubiling lumapit sa akin anumang oras. Mahal na mahal ko po kayo diyan sa Romblon,” pagtatapos ni Go.
