Hinihintay pa ng mga magsasaka sa lalawigan ng Romblon ang ayuda para sa taong 2025 na ipinagkakaloob sa ilalim ng Rice Competitiveness Enhancement Fund–Rice Farmers Financial Assistance (RCEF-RFFA) ng Department of Agriculture.
Sa ilalim ng programa, bawat kwalipikadong magsasaka ay tumatanggap ng tig-P7,000 na tulong pinansyal na ipinapasok sa kanilang Intervention Monitoring Card (IMC), na kahalintulad ng automated teller machine o ATM card kung saan direktang ikinakarga ang pondo.
Ayon sa isang magsasaka, matagal na nilang hinihintay ang panibagong ayuda mula sa programa.
“Delayed na yung ayuda sa amin. Naka-tatlong tanim na kami ng palay mula noong naibigay yung P7,000 last year, hanggang ngayon ay wala pa rin. Tapos magtatanim na ulit sa susunod na linggo,” pahayag ng magsasaka.
Batay sa ulat ng Department of Agriculture–MIMAROPA, nasa 5,226 rice farmers sa Romblon ang nakatanggap ng tulong pinansyal para sa 2024 funding, na ipinamahagi noong Enero 2025.
Gayunman, ayon sa mga source mula sa DA-MIMAROPA, wala pa umanong naibababa na pondo para sa rehiyon para sa 2025 funding, kaya wala pang nadadagdag na laman sa mga IMC o ATM ng mga magsasaka sa kasalukuyan.
Ang RFFA ay nakalaan para sa mga magsasakang may sakahang dalawang ektarya pababa, upang makatulong sa kanilang produksyon at mapalakas ang kakayahang makipagsabayan sa merkado.
Bahagi ang programa ng mga hakbang ng pamahalaan upang suportahan ang maliliit na magsasaka, lalo na sa harap ng tumataas na gastos sa produksyon at kompetisyon sa merkado.
Sa 2026 national budget, tinatayang aabot sa isang milyong rice farmers sa buong bansa ang target na mabigyan ng tulong sa ilalim ng RFFA program.
