Tahimik ngunit determinado ang 25 miyembro ng LETS Farmers Association sa Barangay Dalajican, bayan ng Concepcion, Romblon sa pagpapatunay na sa pamamagitan ng pagtutulungan at sipag ay kayang lagpasan kahit ang pinakamabibigat na pagsubok sa agrikultura.
Sa ilalim ng Fruit Trees Integrated with Goat Production Project ng Special Area for Agricultural Development (SAAD) Program, maaaring wala pa mang kita ang kanilang proyekto, ngunit malinaw na nakikita na ang bunga ng kanilang pagsisikap.
Nagsimula ang proyekto noong 2024 at agad humarap sa seryosong hamon ang asosasyon matapos makaranas ng matinding El Niño. Dahil sa kakulangan ng pagkain, ilang kambing na inalagaan sa isang communal area ang namatay. Dahil dito, napagdesisyunan ng mga miyembro na ipamahagi na lamang ang mga kambing sa bawat magsasaka upang mas mabantayan at maalagaan ang mga ito.
Ayon kay Augustine Ferranco, pangulo ng LETS Farmers Association, naging epektibo ang naging desisyon ng grupo.
“Yong mga kambing namin ay dating nasa communal area pero dumaan ang tagtuyot, kakaunti ang pagkain kaya napagpulungan namin na i-distribute ang mga kambing para mabantayan at maalagaan. Naging maganda naman ang resulta at dumami ang mga kambing,” ani Ferranco.
Dahil sa bagong sistema ng pangangalaga, umabot na ngayon sa 56 ang malulusog na kambing ng asosasyon, kabilang ang 24 na biik, na siyang itinuturing na pinakamalaking kawan sa hanay ng mga benepisyaryo ng SAAD goat production program sa buong MIMAROPA.
Upang matiyak ang patas na pamamahagi, may malinaw na kasunduan ang asosasyon sa paghahati ng mga biik. Ang unang ipinapanganak ay mapupunta sa asosasyon, habang ang susunod ay mapupunta sa miyembro, at may umiiral na palitan kung iisa lamang ang biik na ipinapanganak sa magkakasunod na pagkakataon.
Lubos naman ang pasasalamat ng grupo sa tulong na kanilang natanggap mula sa SAAD Program.
“Nagpapasalamat po kami bilang association sa SAAD dahil napakalaking tulong ang interventions tulad ng kambing, fruit trees at iba pang materyales. Bagamat wala pa kaming kita, nagpupursige kami para lalo pang lumago ang aming association,” dagdag ni Ferranco.
Plano ng asosasyon na unti-unting ibenta ang mga matatandang kambing na mababa na ang produktibidad upang mapanatiling malusog at de-kalidad ang kanilang kawan. Inaasahan nilang makapagsimula ng pagbebenta ng kambing sa susunod na taon, na magsisilbing unang hakbang sa tuluyang pagkakaroon ng kita.
Kasabay ng pag-aalaga ng kambing, patuloy ding inaalagaan ng mga miyembro ang kanilang mga punongkahoy na namumunga at pansamantalang nagtatanim ng gulay sa communal area upang masigurong walang lupang masasayang.
Sa kabila ng mabagal na paglaki ng mga punongkahoy at mga hamong dulot ng kalikasan, nananatiling matatag, matiyaga, at nakatuon ang LETS Farmers Association sa kanilang layuning mapabuti ang kabuhayan ng bawat kasapi sa pamamagitan ng sama-samang pagsisikap. (by Melissa F. Lingco)
