Nagpahayag ng reklamo ang ilang pasahero sa Ambulong Port sa Sibuyan Island kaugnay ng umano’y hindi patas na sistema sa pagbebenta ng tiket ng Starhorse Shipping Lines Inc., lalo na ngayong peak season ng pagbabalik mula sa bakasyon.
Madaling-araw pa lamang ay mahaba na ang pila sa ticketing office ng Starhorse kung saan naghintay ang mga pasaherong pauwi ng Lucena, Odiongan, San Agustin, Banton at Romblon. Sa kabila ng pag-ulan, tiniis ng mga pasahero ang mahabang pila dahil sa abiso ng mga staff na wala umanong ticket reservation at kailangang personal na pumila upang makabili ng tiket.
Gayunman, dismayado at nalungkot ang ilang pasahero matapos sabihing fully booked na ang biyahe kahit kakaunti pa lamang umano ang nabibigyan ng tiket sa mismong ticketing office.
Ayon sa paliwanag ng staff ng shipping lines sa Ambulong Port, puno na raw ang biyahe dahil may mga allotment ng tiket para sa mga pasaherong sakay ng mga bumabiyaheng van.
Ikinadismaya rin ito ng ilang pasahero, kabilang ang mga senior citizen at persons with disability (PWD).
Dahil dito, nanawagan ang mga pasahero na sana ay matigil na ang umano’y favoritism sa Ambulong Port at magkaroon ng patas at malinaw na sistema sa pagbebenta ng tiket, lalo na tuwing peak season.
Hiniling din nila ang agarang aksyon ng lokal na pamahalaan, Philippine Ports Authority (PPA), at ng Starhorse Shipping Lines Inc. upang maresolba ang problema at maiwasan ang pag-uulit ng ganitong sitwasyon.
