Naglabas ang Land Transportation Office (LTO) ng show-cause order laban sa driver at rehistradong may-ari ng isang pulang pick-up truck na sangkot sa pagkamatay ng isang 11-anyos na bata sa Pinamalayan, Oriental Mindoro noong Enero 11.
Ayon sa LTO, mabilis ang takbo ng sasakyan nang masagasaan nito ang bata habang tumatawid sa pedestrian lane, dahilan upang magtamo ng malubhang pinsala sa ulo at katawan na ikinamatay nito sa mismong lugar ng insidente.
Sinuspinde ng LTO ang lisensya ng driver sa loob ng 90 araw at iniutos ang pagsuko nito, habang iniimbestigahan naman ang posibleng pananagutan ng may-ari ng sasakyan, kabilang ang hindi awtorisadong mga modification.
Binigyang-diin ng ahensya na ang kapabayaan sa kalsada ay naglalagay sa panganib ng buhay ng mga pedestrian, lalo na ng mga bata, at tiniyak na paiigtingin ang imbestigasyon upang matiyak ang hustisya sa kaso.
