Patuloy na isinusulong ng administrasyong Marcos ang mga pangunahing proyektong pang-imprastraktura upang mapalakas ang sistema ng kuryente sa Oriental Mindoro at matiyak ang mas maaasahang suplay ng enerhiya sa lalawigan.
Sa isang Palace briefing noong Lunes, sinabi ni Presidential Communications Office Undersecretary at Palace Press Officer Claire Castro na nilagdaan noong Mayo 25, 2026 ang isang kasunduan sa pagitan ng Maharlika Investment Corporation, National Power Corporation (NPC), National Transmission Corporation (TransCo), at National Electrification Administration (NEA).
Ayon kay Castro, layunin ng kasunduan na rehabilitahin, gawing moderno, at paunlarin ang power transmission infrastructure ng Mindoro.
Aniya, inaasahang mapapabuti ng proyekto ang reliability at resiliency ng Mindoro small grid, masuportahan ang pangmatagalang pangangailangan sa enerhiya ng isla, at maihanda ang integrasyon nito sa pambansang grid sa hinaharap.
Bukod dito, inihayag din ni Castro na may inihandang panukalang proyekto ang National Grid Corporation of the Philippines (NGCP) na nagkakahalaga ng P23.9 bilyon para sa pagtatayo ng submarine cable system na mag-uugnay sa Batangas at Oriental Mindoro.
Inaasahang magbibigay-daan ang naturang proyekto sa paglipat ng kuryente mula Batangas patungong Oriental Mindoro at target itong makumpleto pagsapit ng Enero 2028.
Ang submarine cable system ay bahagi ng unang yugto ng Batangas-Mindoro Interconnection and Backbone Project na nagkakahalaga ng P90.6 bilyon.
Layunin ng proyekto na magtayo ng 500-kilovolt (kV) transmission backbone na magpapalakas sa suplay at distribusyon ng kuryente sa Mindoro. Target naman na makumpleto ang buong proyekto bago matapos ang taong 2030.
Matagal nang hinaharap ng Oriental Mindoro ang mga hamon sa suplay ng kuryente, kabilang ang kakulangan sa kapasidad ng power generation at limitadong transmission infrastructure, na nagdudulot ng mga power interruption sa ilang bahagi ng lalawigan.
