Nahuli ng mga operatiba ng Police Regional Office (PRO) MIMAROPA ang isang hinihinalang laboratoryo ng ilegal na droga sa isinagawang raid sa isang compound sa Puerto Galera, Oriental Mindoro, ayon sa ulat ng pulisya.
Ayon kay P/Brig. Gen. Jovencio Badua Jr., isinagawa ang operasyon bilang bahagi ng pinaigting na kampanya laban sa ilegal na droga sa Region IV-B.
Batay sa ulat, nagsimula ang surveillance operations noong Marso 29 matapos makatanggap ng impormasyon ang Puerto Galera Municipal Police hinggil sa kahina-hinalang aktibidad sa lugar. Matapos makumpirma ang umano’y ilegal na operasyon at makakuha ng search warrant mula sa korte noong Lunes, agad na ikinasa ng pulisya ang raid kinabukasan, Marso 31.
Sa isinagawang operasyon, nadiskubre ang hinihinalang shabu laboratory sa loob ng compound. Nakumpiska rin ang mga naka-paketeng hinihinalang shabu at iba’t ibang materyales na pinaniniwalaang ginagamit sa paggawa ng ilegal na droga.
Patuloy ang imbestigasyon ng mga awtoridad kaugnay ng insidente at sa posibleng pagkakakilanlan ng mga sangkot sa operasyon.
