Pinasalamatan ni Governor Trina Firmalo-Fabic si Senator Erwin Tulfo sa tulong na ibinigay sa lalawigan matapos ang pananalasa ng Bagyong Opong.
Ayon sa gobernador, nakipag-ugnayan si Tulfo sa kanya sa pamamagitan ng isang tawag sa telepono at nagpahayag ng kahandaan na tumulong sa mga naapektuhan.
Sa koordinasyon ni Nick Ferrer ng Barangay Ligaya, Odiongan, nakarating na sa lalawigan ang 300 sako ng bigas at mga damit na kasalukuyang nakaimbak sa Odiongan para ipamahagi sa mga apektadong pamilya.
Bukod dito, nakalaan na ang ₱15 milyong pondo para sa Assistance to Individuals in Crisis Situations (AICS) na kasalukuyang pinoproseso ng Department of Social Welfare and Development (DSWD) upang maipamahagi sa mga residente.
“Ang tunay na serbisyo ay ‘yung mabilis na nararamdaman ng tao — lalo na sa panahon ng sakuna. Hangga’t kaya ko, sisikapin kong agad makarating ang tulong sa mga nangangailangan,” ani Sen. Tulfo.
Batay sa ulat ng Provincial Disaster Risk Reduction and Management Office (PDRRMO) at Provincial Social Welfare and Development Office (PSWDO), umabot sa 11,377 indibidwal o 3,412 pamilya ang lumikas sa mga evacuation center o tumuloy pansamantala sa mga kamag-anak. Hanggang Setyembre 27, mahigit 3,400 katao pa rin ang nananatili sa mga evacuation sites.
Sa kabuuan, higit 9,800 kabahayan at ilang imprastruktura ang nasira, dahilan upang ideklara ng Sangguniang Panlalawigan ang buong lalawigan ng Romblon sa ilalim ng state of calamity.
