Ipinatupad ng Department of Trade and Industry (DTI) MIMAROPA ang automatic price freeze sa mga pangunahing bilihin sa buong lalawigan ng Romblon matapos ideklara ang state of calamity noong Setyembre 29 bunsod ng pinsalang iniwan ng Bagyong Opong.
Alinsunod sa Section 6 ng Republic Act 7581 o Price Act, awtomatikong ipinatutupad ang price freeze sa oras na ideklara ang state of calamity at mananatili ito sa bisa ng deklarasyon ngunit hindi hihigit sa 60 araw.
Sakop nito ang siyam na pangunahing bilihin sa ilalim ng hurisdiksyon ng DTI, kabilang ang: canned fish at iba pang marine products, processed milk (evaporated, condensed, powdered milk), kape, laundry/detergent soap, kandila, tinapay (tasty at pandesal), iodized salt, instant noodles at bottled water. Mananatili ang presyo ng mga ito sa antas bago ang deklarasyon ng state of calamity upang maprotektahan ang mga mamimili laban sa posibleng pagmamanipula ng presyo sa panahon ng sakuna.
Batay sa batas, pinahihintulutan ang pamahalaan na magpatupad ng price control sa panahon ng kalamidad upang maiwasan ang pang-aabuso ng ilang negosyante at matiyak na may access ang mga apektadong pamilya sa abot-kayang pangunahing pangangailangan habang nasa yugto ng pagbangon.
Kasabay nito, inihayag ng DTI MIMAROPA na magsasagawa ito ng mas pinaigting na price at supply monitoring sa buong probinsya at nagbabala na ang mga lalabag sa Price Act ay haharap sa mabigat na kaparusahan.
Hinimok din ng ahensya ang mga mamimili na agad i-report sa mga tanggapan ng DTI ang anumang kaso ng overpricing o hindi pagsunod sa price freeze.
