Mula August 23 hanggang 29, nakapagtala ang Romblon Police Provincial Office (PPO) ng serye ng insidente kung saan agad na nakapagresponde ang kanilang mga tauhan sa loob ng ilang minuto matapos matanggap ang mga ulat mula sa 911 at internal communication systems.
Noong August 23, alas-10:03 ng gabi, nakatanggap ng tawag ang Odiongan Municipal Police Station kaugnay ng isang nuisance incident malapit sa Rovillos Hospital sa Brgy. Dapawan. Dalawang patrol team ang agad ipinadala at nakarating sa lugar wala pang limang minuto. Natagpuan nila ang grupo ng mga kabataan na naglalaro ng online games at pinaalalahanan na bawasan ang ingay at umuwi.
Sumunod na araw, August 24, alas-6:55 ng gabi, nakatanggap ng ulat ang San Agustin Municipal Police Station ukol sa gulo sa Sitio San Roque, Brgy. Lusong. Dumating ang mga pulis bago pa ang limang minuto at natukoy na hindi pagkakaunawaan lamang ng dalawang indibidwal, kabilang ang isang menor de edad. Sa tulong ng barangay officials ay maayos na naresolba ang insidente.
Noong August 27, madaling araw, tumugon naman ang Santa Maria Municipal Police Station sa isang vehicular accident sa Brgy. Concepcion Sur. Kasama ang barangay officials at may-ari ng sasakyan, napagkasunduan na ipagpaliban ang recovery operation para matiyak ang kaligtasan ng publiko.
Sa isa pang insidente noong August 23, alas-11:05 ng umaga, nakatanggap ng ulat ang Romblon Municipal Police Station hinggil sa ilegal na sabong ng gagamba malapit sa Romblon National High School. Pagdating ng mga pulis, agad na nagtakbuhan ang mga sangkot at hindi naaresto.
Pinakahuli, noong August 30 bandang alas-2:30 ng madaling araw, nagresponde ang Odiongan Municipal Police Station sa isang insidente ng pananaksak sa labas ng isang bar sa Brgy. Dapawan. Dinala ang biktima sa Romblon Provincial Hospital habang nagsasagawa ng hot pursuit operation ang mga awtoridad upang mahanap ang suspek.
Ayon kay Col. Rexton Sawi, Provincial Director ng Romblon PPO, mananatiling handa ang kanilang hanay na agarang rumesponde sa mga insidente upang matiyak ang kaligtasan ng publiko.
Hinikayat din ng PPO ang mga residente na manatiling mapagmatyag at ireport ang kahina-hinalang aktibidad sa 911 National Emergency Hotline o sa pinakamalapit na himpilan ng pulisya.
