Sa kanyang privilege speech sa ika-9 na regular na sesyon ng Sangguniang Bayan noong Setyembre 1 binigyang-diin ni Konsehal Lyndon Molino ang umano’y kawalan ng epekto ng bilyong pisong inilaan para sa flood control projects sa lalawigan, sa kabila ng patuloy na pagbaha sa ilang lugar.
Ayon kay Molino, batay sa ulat na isinumite sa Malacañang’s “Sumbong sa Pangulo” website, mula Hulyo 2022 hanggang Pebrero 2025, mahigit ₱5.8 bilyon ang inilaan para sa mahigit 80 flood control projects sa Romblon. Karamihan dito ay nasa Tablas Island, ilan sa Sibuyan, at dalawa sa mismong bayan ng Romblon, partikular sa Barangay Sawang at Barangay Lunas.
Dagdag pa rito, nakapaloob sa 2025 General Appropriations Act ang karagdagang ₱6.6 bilyon para sa mga katulad na proyekto sa lalawigan.
Binanggit ni Molino na sa kabila ng halagang ito, patuloy pa ring nakararanas ng matinding pagbaha ang ilang komunidad, kabilang ang Poblacion.
Ani pa niya, may pangamba na ang ilang imprastraktura gaya ng cross-country at farm-to-market roads sa mga lugar na wala namang sakahan ay posibleng nakapagpalala pa ng pagbaha.
Sa kanyang talumpati, inihalimbawa rin niya ang pahayag ni Rodne Galicha, miyembro ng MIMAROPA Regional Development Council mula sa civil society sector, na matagal nang isyu ang hindi pagtutugma ng mga proyektong inendorso ng mga LGU at ahensya sa rehiyon sa aktwal na nailalabas na pondo sa pambansang badyet.
Iginiit ni Molino na dapat masusing suriin ang implementasyon ng mga flood control projects, tiyakin ang konsultasyon sa LGUs bago ipatupad, at palakasin ang project monitoring system ng pamahalaan alinsunod sa umiiral na batas.
“Oras na para ipatupad ang batas, busisiin ang mga proyekto, at ituon ang pondo sa totoong solusyon. Hindi tayo dapat lumubog sa baha—lalo na’t nilulunod na tayo ng flood control funds na hindi naman kumokontrol sa baha,” pagtatapos ni Molino.
Walang pang pahayag ang pamunuan ng Department of Public Works and Highways – Romblon District Engineering Office sa pahayag ni Molino.
