Ipinahayag ni Governor Trina Alejandra Firmalo-Fabic ang buong suporta ng Pamahalaang Panlalawigan ng Romblon sa panawagan ng publiko para sa masusing imbestigasyon kaugnay sa mahigit ₱5.8 bilyon na inilaan para sa higit 80 flood control projects sa lalawigan mula Hulyo 2022 hanggang Pebrero 2025.
Sa inilabas na opisyal na pahayag, sinabi ng gobernador na handa ang provincial government na maging bahagi ng imbestigasyon upang matiyak ang integridad ng bawat proyekto.
Bilang tugon, bubuo umano ng task force alinsunod sa Romblon Good Governance Code of 2025 na tututok sa pag-validate ng mga proyekto, katuwang ang Commission on Audit (COA) at Department of Public Works and Highways (DPWH). Layon nito na maging malinaw, bukas, at may pananagutan ang lahat ng hakbang.
Ayon kay Firmalo-Fabic, nakipag-ugnayan na rin ang probinsya sa bagong kalihim ng DPWH na si Secretary Vince Dizon upang ipahayag ang kooperasyon ng lalawigan sa imbestigasyon.
“Ang ating layunin: masiguro na ang pondong galing sa gobyerno ay para sa serbisyo sa tao, at para sa mga proyektong tunay na nangangalaga sa buhay, ari-arian, at kinabukasan ng mga komunidad laban sa baha at sakuna,” ani Firmalo-Fabic.
Dagdag pa niya, kaisa ang pamahalaang panlalawigan sa panawagan ng taumbayan na papanagutin ang dapat managot at tiyakin ang transparency, accountability, at malasakit sa isyung ito.
