Dalawang pinakamalalaking contractor sa bansa para sa flood control projects—ang St. Timothy Construction Corporation at Sunwest, Inc.—ang nakakuha ng kabuuang ₱1.7 bilyong halaga ng mga flood control projects sa Romblon sa 2025, ayon sa datos ng Department of Public Works and Highways (DPWH).
Batay sa tala ng DPWH, may kabuuang walong proyekto si Sunwest, Inc. sa Romblon na nagkakahalaga ng ₱1,021,862,669.78. Kabilang dito ang konstruksyon ng mga flood control structure sa Sitio Cabitangahan, Barangay Taclobo sa San Fernando; Gabawan Bridge at Tabobo-an River sa Odiongan; Sitio Cabangahan, Barangay Carmen at Sitio Agcahico, Barangay Carmen (Phase 2) sa San Agustin; Barangay Cantingas sa San Fernando; Mari-Sur Flood Control (Right Side) at Victoria River Flood Control sa San Andres.
Samantala, may isang proyekto naman ang St. Timothy Construction Corporation na nagkakahalaga ng ₱142,576,731.04 para sa rehabilitasyon ng flood control structure sa Cambijang Bridge (Upstream) sa bayan ng Cajidiocan.
Sa ulat ni Pangulong Ferdinand R. Marcos Jr. noong Agosto 11, kabilang ang dalawang kompanyang ito sa mga top contractors ng bansa batay sa kabuuang halaga ng kontrata mula 2022.
Ipinahayag din ng Pangulo ang mga paunang natuklasan ng pamahalaan sa flood control projects mula Hulyo 2022 na umabot sa PHP545 bilyon ang kabuuang paggasta.
Ayon sa Pangulo, bagaman may 2,409 kontratista sa buong bansa, halos 20% ng halagang ito—katumbas ng PHP109 bilyon—ay napunta lamang sa 15 kontratista. Ilan sa kanila ay may kontrata sa iba’t ibang panig ng bansa, na tinawag ng Pangulo na “highly unusual” para sa sektor ng konstruksyon.
Kabilang din sa mga iregularidad na natukoy ang 6,021 proyekto na nagkakahalaga ng mahigit PHP350 bilyon ngunit walang detalye kung anong uri ng flood control structure ang itinatayo.
Mayroon ding mga proyektong magkakapareho ang presyo ng kontrata sa kabila ng pagkakaiba ng lokasyon—isang bagay na tinawag ni Marcos na “imposible.”
Ipinunto rin ng Pangulo na hindi tugma ang distribusyon ng mga proyekto sa opisyal na hazard maps, at karamihan sa 170 pumping stations ng bansa (157) ay nasa Metro Manila, kung saan marami ang hindi gumagana dahil sa bara ng basura.
Bagama’t may mga nakitang iregularidad, nilinaw ni Marcos na hindi pa ito pormal na kaso at kailangan pa ng masusing imbestigasyon. “Gusto nating managot ang mga nang-abuso sa sistema, pero hindi natin magagawa ito nang walang tulong ng mamamayan,” aniya.
